DILI, 04 dezembru 2022 (TATOLI)—Lider istóriku, Kay Rala Xanana Gusmão triste ho Jornalista Australiana Jill Jolliffe nia mate no konsidera hanesan ativista polítika no eroina ba Timor Leste iha prosesu luta ba libertasaun nasionál liuhosi informasaun.
“Jill hanesan ativista, rebelde, lutadora ida. divulga ho presistente realidade husi okupasaun Indonezia no luta povu Timor-Leste. Sempre iha fatin espesiál iha ita-nia istória nasionál. Nia hanesan ho ita ida,” Xanana Gusmao informa liuhosi nota imprensa ne’ebé ne’ebé Tatoli asesu ohin.
Xanana rekoñese luta pessoál hosi Jill Jolliffe liuliu iha kobertura ne’ebé nia halo iha tinan 1975, iha inkursaun dahuluk Indonézia nian no trajédia Balibó ne’ebé hamate Jornalista Brian Peters, Greg Shackleton, Gary Cunningham, Malcolm Rennie no Tony Stewart.
Jill hela Dili hodi kobre proklamasaun Independénsia 28 novembru 1975. Nia hasai foto ho ita-nia líder sira, inklui Prezidente Repúblika Nicolau Lobato ne’ebé sempre sai imajen presioza no ikonónika ba ita-nia nasaun.
Matebian públika nia livru dahuluk kona-ba Timor-Leste iha 1978, fila hikas mai iha tinan 1994 hodi halo viajen klandestina ba foho hodi entrevista líder rezisténsia Konis Santana no divulga abuzu direitu umanu hosi forsa Indonézia iha Timor-Leste.
Entidade Governu, sosiedade sivíl, individu no seluk tan mós hato’o ona sentida kondolénsia ba família enlutada.
Jill Jolliffe simu medalla orden soliedaridade hosi Governu Timor-Leste iha tinan 2014.
Jornalista :Felicidade Ximenes
Editór: Evaristo Soares Martins
