Mbappé sai eroi lori Fransa hakat ba kuartu finál Kopa Mundiál 2026
DILI, 05 Jullu 2026 (TATOLI)—Fransa avansa ba kuartu-finál Kopa Mundiál 2026 hafoin halakon Paraguai 1-0 iha jogu Kopa Mundiál 2026 iha jornada faze 16 iha Estádiu Filadélfia, Domingu dader, oras Timor-Leste nian.
Kylian Mbappé sai eroi ba vitória selesaun nasionál Fransa nian liuhusi ezekusaun penalidade iha minutu 69, hafoin árbitru hatudu ba fatin ne’e hafoin haree VAR no determina katak médiu paraguai Diego Gomez halo falta ba Désire Doué.
Fransa kualifika ona ba kuartu-finál Mundiál 2026, sei hasoru Maroko tanba Maroko kualifika hafoin vitória 3-0 hasoru Kanadá iha jogu 16 iha Domingu madrugada oras Timor-Leste nian.
Maske sira nia dezempeñu dominante, Fransa luta atu kria oportunidade sira-ne’ebé klaru iha primeira parte tanba Paraguai nia defeza sólidu hanesan luru Berlin ne’ebé susar atu sobu no haborus.
Paraguai nia defeza ne’ebé maka’as halo jogadór fransés sira koko suta husi liur área penalidade nian. Maibé, tantu Manu Kone no Adrien Rabiot nia tentativa sira la sai alvu, nune’e primeira parte termina ho 0-0.
Iha inísiu segunda parte, Fransa tenta atake lalais ho Mike Maignan haruka pasajen naruk ida ba Mbappé, maibé molok Mbappé bele hetan suta ida, bola ne’e hetan blokeiu husi Juan Jose Caceres.
Kone lansa suta ida husi liur área penalidade nian ne’ebé maka dirije ba kantu leten karuk hosi baliza Paraguai nian. Gill lee bola ho di’ak no soe ho liman.
Fransa ataka lalais, no Mbappé, dribling bola ba kaixa penalidade Paraguai nian, halo suta ida. Esforsu Mbappé nian obriga guarda-rede Paraguai Gill halo salvasaun.
Dayot Upamecano halo sala, no Mauricio koko atu kapitaliza. Maibé, nia suta hetan salvasaun hosi Mike Maignan, halo nia salvasaun dahuluk iha jogu ne’e.
Iha tempu adisionál nian, Mbappé kuaze aumenta vantajen Fransa nian. Suta Mbappé nian ne’ebé Gill hapara, no rebote hetan blokeiu husi guarda-rede Paraguai nian.
Paraguai:
Gill, Alderete (Canale 58′), Gustavo Gomez, Velazquez, Alonso, Caceres, Almiron (Avalos 71′), Galarza, Cubas, Diego Gomez (Mauricio 71′), Enciso (Caballero 61′).
Fransa:
Maignan, Digne, Lintasa, Upamecano, Kounde, Rabiot, Kone, Barcola (Doue 61′), Olise, Dembele (Cherki 84′), Mbappe.
Jornalista : Hortêncio Sanchez
Editór : Cancio Ximenes
