VIQUEQUE, 14 dezembru 2022 (TATOLI)— Uma kain 37 iha Suku Caraubalo, Postu Administrativu Viqueque Villa, Munisípiu Viqueque sai benifísiariu ba programa Uma Kibit Laek (UKL) + B.
Liafuan ne’e dehan hosi Xefe Suku Caraubalo, João Pinto ba jornalista sira, iha sede suku Caraubalo, Viqueque Villa, kuarta ne’e.
Xefe Suku ne’e isplika, uma kain 37 iha Suku Caraubalo, simu ona kalen liu hosi implementasaun Programa Nasionál Dezemvolvimentu Suku (PNDS) UKL + B.
“Distribuisaun kalen ba benifísiariu UKL + B iha suku Caraubalo, ba komunidade uma-kain 37 no governu fó tempu fulan ida atu benefísiariu sira taka sira-nia uma”, Autoridade suku Caraubalo ne’e dehan.
Maibé dadaun ne’e benifísiariu 37 suku Caraubalo balu komesa ona taka kalen ne’ebe sira simu.
“Governu liu hosi PNDS apoia kalen ba ita-nia kominidade. Maibe konaba pregu no badaen laiha. Tanba ne’e, komunidade sira rasik mak sobu no taka rasik kalen ne’ebe governu apoiu ba ne’e. Nune’e iha aldeia Cabira-oan benifísiariu uma kain rua maka halo karta rejignasaun tanba sira laiha kbi’it hodi sosa pregu. Benifísiariu na’in rua ne’ebé regina an ne’e ami subtitui fali uma kain rua hodi troka fila ona nune’e suku Caraubalo benifísiariu nafatin 37”, nia hato’o.
Distribuisaun kalen iha suku Caraubalo ne’e, fo ba aldeia hamutuk hitu, mak hanesan, aldeia Cabira-Oan iha benifísiariu lima, aldeia Has Abut (7), aldeia Lamac Laran (5), aldeia Mamulac (5), aldeia mane haat (5) no aldeia Wessa hamutuk uma kain lima (5).
Jornalista : Vitorino Lopes da Costa
Editóra : Armandina Moniz
