KOVALIMA, 08 Juñu 2026 (TATOLI)- Ministériu Solidariedade Sosiál no Inkluzaun ( MSSI), Veronica das Dores hamutuk ho autoridade Kovalima, segunda-ne’e, fó apoiu nesesidade bázika ba família vulnerável sira hamutuk 278 ,iha Suku Suai Loro,Postu Administrativu Suai, Munisípiu Kovalima.
Molok atu hala’o distribui nesesidade bázika ba família vulnerável-sira, iha Suku Suai Loro, katuas lia-na’in sira simu Ministra Solidariedade Sosiál no Inkluzaun Sosiál (MSSI) Veronica das Dores ho lia dadolin tuir lisan Suku Suai Loro.
“Ha’u hakarak apoiu ba ferik no katuas sira la’os iha interese ruma maibé sai hanesan kustume hodi fó apoiu ba ita boot sira,” Ministra MSSI, Veronica das Dores hato’o molok distribui nesesidade bázika iha Suku Suai Loro.
Membru Governu distribui nesesidade bázika ne’e mak hanesan, foos kilograma 25 ho marka Sosiál saku ida ho Pakote komplementar hanesan, Mina-tein,biskuit, foremungu, susu-been, supermie, sardina no seluk tan.
“ Ha’u mai iha suku Suai-Loro no suku sira seluk ita hasoru malu ita tenke hadomi lalika hanoin oho malu tenke kria pás ba malu, ita nia dezenvolvimentu bele la’o bainhira kria pas no estabilidade iha suku Suai Loro”, nia afirma.
Reprezentante Prezidente Autoridade Munisípiu Kovalima, Idenfonso Maria Amaral, hato’o agradese bazeia ba proposta husi Xefe Suku ba Ministra MSSI mai hodi distribui nesesidade bázika ba família vulnerável iha suku Suai-Loro.
“ Ha’u hato’o agradese ba MSSI tanba iha fulan kotuk xefe suku submete pedidu, ohin, hakarak mai haree direita ba ita nia komunidade vulnerável hodi distribui nesesidade bazika,” nia dehan.
Autoridade Kovalima mós fó hanoin ba komunidade sira ne’ebé mak nia naran seidauk konsege rejista iha sede xefe suku hamutuk funsionáriu sosial sei kontinua halo levantamentu dadus hodi supmete ba MSSI atu kontinua distribui nesesidade bázika tuir kbi’it Governu ni’an.
Tuir dadus Família vulnerável ne’ebé mak Governu distribui nesesidade bázika ho pakote komplementar ne’e hamutuk 278 husi númeru ne’e família vulnerável 183 no EhD 95.
Jornalista:Celestina Teles
Editór:Florencio Miranda Ximenes
