Top

Tributária Kovalima kontribui reseita $17.560 ba kofre Estadu

Diretór Repartisaun Tributária Munisípiu Kovalima, Laurindo Amaral.foto TATOLI/Celestina Teles. Imajen Tatoli/Celestina Ximenes.

KOVALIMA, 21 Novembru 2026 (TATOLI)–Ministériu Finansa liuhusi Repartisaun Tributária Munisípiu Kovalima,hahú husi Janeiru to’o Setembru 2026 ne’e, kontribui ona reseita hamutuk $17.560 ba kofre Estadu.

Diretór Repartisaun Tributária Munisípiu Kovalima, Laurindo Amaral, informa reseita ne’ebé kontribui ba kofre Estadu ne’e mai husi fonte ho tipu impostu haat (4) mak hanesan impostu salariál, impostu retidu, impostu sobre servisu no impostu rendimentu anuál.

“Tipu impostu haat ne’e la iha mudansa, nune’e ita kontribui ona reseita iha trimestre ba dahuluk hamutuk $5.705,33, trimestre ba daruak $5.376,82 no trimestre ba datoluk $6.477,95,” Laurindo Amaral relata dadus ne’e ba jornalista sira iha Kovalima.

Iha trimestre ba dahuluk, Repartisaun Tributária Kovalima kontribui reseita hamutuk $5.705.33, ne’ebé mai husi impostu salariál $790.33, impostu retidu $1.129.10, impostu sobre servisu $1.195.75 no impostu rendimentu anuál $2.590.15.

Iha trimestre ba daruak, reseita ne’ebé kontribui hamutuk $5.376.82 ne’e mai husi impostu salariál $588.17, impostu retidu $1.188.65, impostu sobre servisu $1.100 no impostu rendimentu anuál $2.500.

Enkuantu, iha trimestre ba datoluk, Repartisaun Tributária Kovalima kontribui reseita hamutuk $6.477.95 ne’e mai husi impostu salariál $745.78, impostu retidu $1.457.15, impostu sobre servisu $1.170 no impostu rendimentu anuál $3.005.03.

Jornalista : Celestina Teles

Editór        : Cancio Ximenes

Publisidade

Leave a Reply

Latest Post

error: Content is protected !!