KRAM Koordena PNTL Kovalima implementa lei prátika arte marsiál

KOVALIMA, 19 Novembru 2026 (TATOLI) – Komisaun Reguladora Arte Marsiál (KRAM) koordena ho Komandu Polísia Nasionál Timor-Leste (PNTL) Munisípiu Kovalima, atu hametin kolaborasaun ba implementasaun Lei Nú. 9/2026 kona-ba Rejime Jurídiku ba Prátika Arte Marsiál iha Timor-Leste.
Prezidente KRAM, Octavio da Conceição, halo vizita ba Komandu PNTL Munisípiu Kovalima, ho objetivu atu diskute preparasaun ba prosesu sosializasaun lei numeru 9/2026 ne’e ba organizasaun no grupu arte marsiál sira iha munisípiu refere.
“ Liga ho implementasaun lei númeru 9/2026 rejime juridika ba prátika arte marsial iha TL, nune’e hau mai Komandu PNTL munisípiu Kovalima ho intensaun atu halo koordenasaun servisu ba implementasaun lei númeru 9/2026 preparasaun ba sosializa lei referidu iha área juridisaun iha Kovalima”, Prezidente KRAM, Octavio da Conceição inform aba jornalista hafoin koordena iha komandu PNTL Kovalima.
Hafoin iha prosesu avaliasaun, instituisaun kompetente sei kontinua halo preparasaun diretiva atu orienta atividade prátika arte marsiál iha Timor-Leste. Diretiva sira ne’e sei bazeia ba kna’ar Komisaun Fiskalizasaun no Monitorizasaun no Komisaun Reguladora Arte Marsiál Desportiva, ne’ebé estabelese iha Lei Nú. 9/2026.
Iha parte seluk, Komandante PNTL Munisípiu Kovalima, Superintendente Xefe Polísia Paulino Carmo Ferreira, hateten katak, koordenasaun ne’e importante atu prepara prosesu sensibilizasaun kona-ba implementasaun Lei Nú. 9/2026, ne’ebé revoga Lei Nú. 5/2017.
Bazeia ba dadus ne’ebé aprezenta, iha Munisípiu Kovalima identifika grupu arte marsiál PSHT, IKS, PTL no Korka, ne’ebé hala’o atividade treinu iha Postu Administrativu Maucatar, Suai, Zumalai no Tilomar.
Dadus refere hatudu katak iha total rantin treinu 58 ne’ebé presiza identifika no akompaña iha prosesu implementasaun lei foun ne’e.
Komandante hato’o agradese ba Prezidente KRAM nia vizita no inisiativa koordenasaun ne’e, tanba informasaun no sosializasaun lei importante tebes molok implementasaun to’o ba komunidade.
PNTL sei kontinua kolabora ho KRAM atu prosesu sosializasaun bele to’o ba Postu Administrativu hotu no organizasaun arte marsiál sira, hodi asegura atividade desportiva ne’e hala’o tuir regra no prosedimentu legal.
Ho koordenasaun ne’e, KRAM no PNTL hein katak implementasaun Lei Nú. 9/2026 bele hametin ordenamentu prátika arte marsiál, prevene problema seguransa no kontribui ba manutensaun dame no estabilidade iha komunidade.
Jornalista: Celestina Teles
Editór: Florencio Miranda Ximenes

