Top

Organizasaun CBRN-TL realiza formasaun prevensaun Violénsia Bazeia ba Jéneru iha Kovalima

Feto vulnerável sira tuir formasaun kona-bá precensaun VBJ.iha Salaun postu Suai.Foto TATOLI/Celestina Teles.

KOVALIMA, 18 Novembru 2026 (TATOLI) –  Organizasaun Community Based Rehabilitation Network Timor-Leste (CBRN-TL) fasilita formasaun kona-ba prevensaun no responde ba Violénsia Bazeia ba Jéneru (VBJ) ba feto ho defisiénsia, membru komunidade LGBTIQ+ no joven feto vulnerável sira iha Munisípiu Kovalima.

Formasaun ne’ebé hala’o durante loron tolu  ho  objetivu atu hasa’e koñesimentu no kapasidade partisipante sira kona-ba igualdade jéneru, direitu ema ho defisiénsia, prevensaun violénsia no dalan atu responde bainhira hasoru kazu violénsia iha família no komunidade.

Koordenadora Programa Prevensaun no Responde ba Violénsia Bazeia ba Jéneru iha Nível Komunidade hosi CBRN-TL, Petronela Xavier, hateten katak,  formasaun ne’e foka ba grupu vulnerável sira, hodi fó oportunidade atu komprende tipu violénsia, hatene sira-nia direitu no aprende medida prevensaun.

“Ami fasilita formasaun kona-ba prevensaun no responde ba VBJ durante loron tolu, ho foku ba feto ho defisiénsia, membru komunidade LGBTIQ+ no joven feto vulnerável sira hosi Suku Debos, Suai Loro no Holpilat. Ami kapasita sira atu hatene oinsá halo prevensaun ba violénsia ne’ebé bele akontese iha família no komunidade,” nia dehan ba jornalista sira iha salaun postu administrativu Suai Tabakolot.

Nia hatutan, atividade ne’e importante tanba feto balu ne’ebé hasoru violénsia dala barak la konsege hato’o sira-nia problema ka buka ajuda , tanba falta koñesimentu, ta’uk no diskriminasaun.

CBRN-TL hakarak hametin konfiansa no kapasidade feto sira, atu sira bele ko’alia kona-ba violénsia ne’ebé sira hasoru, hatene oinsá buka apoiu no asesu ba servisu protesaun ne’ebé disponivel.

Violénsia bazeia ba jéneru bele akontese iha forma oioin, hanesan violénsia fízika, psikolojika no seksuál, ne’ebé bele prejudika vítima sira-nia dignidade, seguransa no direitu nu’udar sidadaun.

Iha sorin seluk, partisipante formasaun, Febriano Felicia Seran, ne’ebé ho kondisaun defisiénsia, hato’o nia kontentamentu tanba hetan oportunidade atu partisipa iha formasaun kona-ba prevensaun no responde ba Violénsia Bazeia ba Jéneru.

“Ha’u hanesan feto ho defisiénsia sente kontente tanba hetan oportunidade atu tuir formasaun kona-ba oinsá prevene no responde ba kazu Violénsia Bazeia ba Jéneru. Liuhosi formasaun ne’e, ha’u bele aumenta ha’u-nia koñesimentu, tanba durante ne’e ha’u seidauk hetan oportunidade hanesan ho ema seluk,” nia afirma.

Febriano Felicia Seran mós defende katak feto ho defisiénsia tenke hetan oportunidade hanesan ho ema seluk, liuliu iha asesu ba formasaun, informasaun no atividade sosiál, atu sira bele dezenvolve kapasidade no partisipa ativu iha komunidade.

Nia hein katak formasaun hanesan ne’e bele kontinua hala’o iha futuru, atu feto ho defisiénsia no grupu vulnerável seluk bele aumenta koñesimentu kona-ba sira-nia direitu, hametin konfiansa no kontribui ba prevensaun violénsia iha komunidade.

Jornalista: Celestina Teles

Editór: Florencio Miranda Ximenes

Publisidade

Leave a Reply

Latest Post

error: Content is protected !!