Top

Prezidente Repúblika kondekora Orden Timor-Leste ba Sekretária-Jerál Prémiu Zayed ba Fraternidade Umana

Prezidente Repúblika, José Ramos-Horta, kondekora Orden Timor-Leste ba Sekretária-Jerál Prémiu Zayed ba Fraternidade Umana, Juis Mohamed Abdelsam. Foto/Nelson de Sousa.

ABU DHABI, 16 Novembru 2026 (TATOLI)-Prezidente Repúblika, José Ramos-Horta, kondekora Orden Timor-Leste ba Sekretária-Jerál Prémiu Zayed ba Fraternidade Umana, Juis Mohamed Abdelsam, nu’udar rekoñesimentu ba ninia kontribuisaun sira ne’ebé destakadu ba umanidade.

Serimónia kondekorasaun ne’e hala’o iha edifísiu of Zayed Award for Human Fraternity, Etihad Towers, iha Abu Dabhi, segunda-feira ne’e.

Orden Timor-Leste nian mak nasaun nia onra aas liu, ne’ebé fó ba individuál sira ne’ebé hala’o ona servisu esepsionál no méritu ba nasaun no ba umanidade.

Prezidente Repúblika, José Ramos-Horta, kondekora Orden Timor-Leste ba Sekretária-Jerál Prémiu Zayed ba Fraternidade Umana, Juis Mohamed Abdelsam. Foto/Nelson de Sousa.

Juis Mohamed Abdelsalam maka juis no peritu legál nian ne’ebé serbisu nu’udar Sekretáriu-Jerál ba Prémiu Zayed ba Fraternidade Umana dezde tinan 2019 no ajuda hakerek Dokumentu istóriku kona-ba Fraternidade Umana ne’ebé asina husi Papa Francisco no Grande Imam Al-Azhar, iha Abu Dhabi, iha loron 04 Fevereiru 2019.

Nia mós lidera Komité Superiór Fraternidade Umana, ne’ebé inisia Loron Internasionál Fraternidade Umana, ne’ebé rekoñese husi Nasaun Unida (ONU). Aléinde ne’e, nia hala’o knaar nu’udar Sekretáriu-Jerál Konsellu Musulmanu ba Ansiaun sira no Ko-Prezidente organizasaun Relijiaun ba Pás.

Nia mak eis-asesór legál ba Imam Boot Al-Azhar no sai musulmanu árabe dahuluk ne’ebé simu distinsaun Orden Papa Pio IX, iha kategoria Komandante Kavaleiru, husi Papa Francisco.

Juis Mohamed Abdelsalam simu Kolár Orden Timor-Leste tuir Dekretu Prezidente Repúblika númeru 134/2026, nu’udar rekoñesimentu ba ninia papél signifikativu iha promosaun valór fraternidade umana, diálogu interrelijiozu, toleránsia, koezisténsia pasífika, no aprosimasaun entre povu no kultura sira. Ninia serbisu kontribui ona ba dezenvolvimentu inisiativa internasionál sira ne’ebé ho objetivu atu hametin koezisténsia pasífika entre komunidade relijioza oioin, defeza direitu umanu no liberdade relijioza, no harii sosiedade sira ne’ebé justu liu, inkluzivu no apoiu.

Ramos-Horta hatete katak kondekorasaun ne’e hodi fó onra no rekoñese Juis Mohamed Abdelsam.

Prezidente Repúblika, José Ramos-Horta, kondekora Orden Timor-Leste ba Sekretária-Jerál Prémiu Zayed ba Fraternidade Umana, Juis Mohamed Abdelsam. Foto/Nelson de Sousa.

“Ita rekoñese moris ida ne’ebé dedika ba aspirasaun umana sira ne’ebé nobre liu. Promosaun fraternidade entre povu hotu, diálogu ne’ebé liga fiar no kultura sira, no buka inkansavel ba pás. Ninia serbisu enkarna espíritu solidariedade no kompriensaun ne’ebé Timor-Leste iha nu’udar nasaun ne’ebé harii iha rekonsiliasaun no esperansa. Ho respeitu no gratidaun ne’ebé kle’an maka ita kondekora ba nia, ami-nia nasaun nia onra aas liu”, nia dehan.

Timor-Leste mak nasaun dahuluk ne’ebé adota formalmente dokumentu kona-ba Fraternidade Umana iha ninia valór nasionál sira iha tinan 2022.

Prezidente Ramos-Horta serbisu ona iha komisaun Juis ba Prémiu Zayed nian no partisipa ona iha ninia serimónia sira no Majlis Fraternidade Umana nian iha Abu Dhabi, hodi reafirma Timor-Leste nia kompromisu ba diálogu interrelijiozu, toleránsia no koezisténsia pasifika.

Biban ne’e, Juis Mohamed Abdelsam agradese ba rekoñesimentu Estadu no povu Timor-Leste nian.

Jornalista: Nelson de Sousa

Editora: Maria Auxiliadora

 

Publisidade

Leave a Reply

Latest Post

error: Content is protected !!