Ramos-Horta hametin kooperasaun diplomátika no komersiál ho Emiradu Árabe Unidu

ABU DHABI, 16 Novembru 2026 (TATOLI) – Prezidente Repúblika, José Ramos-Horta, hala’o enkontru diplomátiku nivel aas ho Ministra Estadu iha Ministériu Negósiu Estranjeiru Emiradu Árabe Unidu (EAU), Noura Al Kaabi, no realiza mós enkontru komersiál ho líder negósiu proeminente, Salah Sharaf, atu hametin relasaun bilaterál no promove kooperasaun ekonómika entre nasaun rua.
Enkontru diplomátiku no komersiál sira-ne’e hala’o iha Otél Emirates Palace, Abu Dhabi, ho objetivu atu hametin parseria estratéjika entre Timor-Leste no EAU.
Iha enkontru bilaterál ho Noura Al Kaabi, Prezidente Ramos-Horta fó atensaun ba esforsu atu aselera kooperasaun iha área edukasaun, diplomasia kulturál no dezenvolvimentu sosiál.

Diskusaun sira inklui parseria dezenvolvimentu ne’ebé konkretu, hanesan konstrusaun rezidénsia universitária ba estudante feto na’in-300 iha Dili, ne’ebé EAU finansia, no oportunidade ba formasaun diplomátika iha Akademia Diplomátika Anwar Gargash, iha Abu Dhabi.
Líder rua ne’e mós ko’alia kona-ba posibilidade atu habelar apoiu institusionál no dezenvolve rekursu umanu, tuir prioridade dezenvolvimentu nasionál Timor-Leste nian.
Aléin diálogu diplomátiku, Prezidente Ramos-Horta realiza mós konsulta komersiál ho Salah Sharaf, ho objetivu atu loke oportunidade foun ba investimentu diretu no habelar relasaun komérsiu entre nasaun rua.
Diskusaun sira foka ba esforsu atu atrai investimentu husi EAU ba setór estratéjiku sira iha Timor-Leste, inklui lojístika, infraestrutura, enerjia renovavel no turizmu sustentavel.
Enkontru sira-ne’e akompaña mós husi Embaixadór Timor-Leste nian ba EAU, Rui Manuel Hanjam, Embaixadór Naun-Rezidente EAU nian ba Timor-Leste, Abdulla Salem Al Dhaheri, no Asesór Xefe Prezidente Repúblika ba Relasaun Internasionál, Nelson Gaspar Ferreira dos Santos, hamutuk ho membru delegasaun sira seluk.
Jornalista: Nelson de Sousa
Editora: Maria Auxiliadora

