Top

Prezidente Repúblika no Ministru Toleránsia no Koezisténsia EAU reafirma kompromisu kona-ba promosaun fraternidade umana

Prezidente Repúblika no Ministru Toleránsia no Koezisténsia EAU reafirma kompromisu kona-ba promosaun fraternidade umana. Foto/Nelson de Sousa.

ABU DHABI, 16 Novembru 2026 (TATOLI) – Prezidente Repúblika, José Ramos-Horta, hala’o enkontru ho Ministru Toleránsia no Koezisténsia Emiradu Árabe Unidu (EAU), Sheikh Nahyan bin Mubarak Al Nahyan, hodi reafirma kompromisu kona-ba promosaun fraternidade umana no pás.

Durante Xefe Estadu nia vizita servisu ofisiál bá Abu Dhabi, hala’o sorumutu nivel aas ne’e hodi fornese plataforma vitál ida hodi reafirma amizade dura entre país rua ne’ebé aumenta metin iha kompromisu konjuntu hodi promove pás globál, diálogu interkulturál, no koezisténsia pasífika.

Diskusaun sira foka ba hametin kolaborasaun kona-ba valór universál sira husi dokumentu istóriku fraternidade umana, ne’ebé Timor-Leste adota ona formalmente ba ninia kuadru nasionál.

Prezidente Repúblika no Ministru Toleránsia no Koezisténsia EAU reafirma kompromisu kona-ba promosaun fraternidade umana. Foto/Nelson de Sousa.

Líder rua ne’e subliña importánsia husi promosaun armonia interrelijioza, respeitu mútuu, no koezaun sosiál nu’udar baze esensiál ba dezenvolvimentu sustentavel, hodi fó énfaze katak estabilidade globál presiza investimentu ativu iha kompriensaun kulturál no empoderamentu foinsa’e sira-nian.

Enkontru ne’e akompaña husi Embaixadór Timor-Leste nian ba EAU, Rui Manuel Hanjam, Embaixadór Naun-Rezidente EAU nian ba Timor-Leste, Abdulla Salem Al Dhaheri, Asesor Sénior Prezidente Repúblika ba Relasaun Internasionál, Nelson Gaspar Ferreira dos Santos, no delegasaun sira seluk.

Jornalista: Nelson de Sousa

Editora: Maria Auxiliadora 

 

Publisidade

Leave a Reply

Latest Post

error: Content is protected !!