FRETILIN hada fatuk hamutuk hodi haree jerasaun foun nia futuru la’ós kadeira
DILI, 13 Novembru 2026 (TATOLI)—Sekretáriu Jerál no Prezidente Interinu FRETILIN, Marí Alkatiri, hateten iha eleisaun prezidensiál ne’ebé akontese iha 2027 ne’e FRETILIM laiha kandidatura tanba FRETILIN nia objetivu boot liu mak atu hada fatuk hamutuk, haree ba jerasaun foun sira-nia future no la’ós haree ba kadeira.
Notísia Relevante: PM Xanana apoia feto atu kandidata ba Prezidente Repúblika
“Maibé ha’u-nia objetivu mak ne’e, mai ita hada fatuk hamutuk haree ba future. Jerasaun tuan nia tempu hela uitoan de’it ona, ita hamutuk la’ós ba ita-nia an maibé haree ba jerasaun foun sira mai ne’e nia futuru. Ida-ne’e mak ha’u-nia intensaun, la’ós atu hetan kadeira ou la hetan kadeira, ita hakarak prepara buat di’ak ruma ba futuru rai ida-ne’e,” Alkatiri hateten ba jornalista sira liuhusi konferensia imprensa iha Gabinete Eis Titular Faról, Dili, kinta ne’e.
Nia hateten, nia parte respeita deklarasaun Primeiru-Ministru, Kay Rala Xanana Gusmão, ne’ebé atu apoia feto ba Prezidente Repúblika iha períodu 2027-2031 maibé nia rasik seidauk fiar tomak katak Xanana sei fó apoia ba feto.
“Nia fó deklarasaun apoia ba feto ba Prezidente Repúblika, maibé ha’u rasik seidauk fiar katak nia atu fó apoia ba feto, nia sei fó apoia ba mane maibé ha’u respeita ema hotu nia deklarasaun,” Alkatiri hateten ba jornalista sira liuhusi konferensia imprensa iha Gabinete Eis Titular Faról, Dili, kinta ne’e.
Tuir notísia antes ne’e, Primeiru-Ministru Xanana Gusmão deklara nia sei apoia pesoalmente feto ida atu sai Prezidente Repúblika bainhira hala’o nia diskursu iha aniversáriu Loron Nasionál Feto Timor-Leste ba da-50, iha Sentru Konvensaun Dili (CCD), iha Sesta (06 Novembru 2026).
Iha diskursu ne’e, Xanana hateten: “I will personally support a woman for President of the Republic” ka ha’u sei apoia pesoalmente feto ida ba Prezidente Repúblika.”
Xanana mós subliña nesesidade atu prepara no fó oportunidade ba jerasaun foun, liuliu feto foinsa’e sira, atu sai líder, inovadór no protagonista ba futuru Timor-Leste. b745
FRETILIN laiha kandidatura
Iha fatin hanesan, Alkatiri klarifika katak partidu FRETILIN laiha kandidatura ba Prezidente Repúblika iha eleisaun prezidensiál 2027.
“Ha’u rasik hanesan Sekretáriu Jerál no Prezidente Interinu FRETILIN, ha’u rasik laiha kandidatura ba Prezidente Repúblika,” nia dehan.
Jornalista : Hortêncio Sanchez
Editór : Cancio Ximenes
