Servisu Notariadu Kovalima rejista Komunidade rihun 63 hetan ona sertidaun RDTL

KOVALIMA, 18 Novembru 2026 (TATOLI) – Ministeriu Justisa liuhusi Servisu Munisipál Konservatóriu Rejistu Notariadu Munisípiu Kovalima rejista ona sertidaun moris ba sidadaun na’in-63.152 durante períodu 2025 to’o 2026, nu’udar parte husi esforsu instituisaun ne’e atu fasilita prosesu dokumentasaun legál ba komunidade iha munisípiu ne’e.
Dirijente Servisu Munisipál Konservatóriu Rejistu Notariadu Munisípiu Kovalima, Filomena Gusmão, informa katak sertidaun moris RDTL nu’udar dokumentu importante ne’ebé sidadaun hotu-hotu iha direitu atu hetan, tanba dokumentu ne’e sai hanesan prova legál ba identidade no nu’udar baze atu trata dokumentu administrativu seluk.
“Ita hotu-hotu iha direitu atu trata dokumentu hanesan sertidaun moris RDTL, maibé sidadaun sira barak foin mai trata dokumentu bainhira iha nesesidade urjente. Ami kontinua hala’o atividade atu prodús sertidaun no fó fasilidade ba sidadaun sira,” nia dehan iha salaun domin CNE Kovalima.
Sistema administrasaun no rejistu dokumentu iha instituisaun ne’e hetan ona mudansa husi sistema manual ba sistema dijitál. Husi tinan 2003 to’o 2014, servisu rejistu dokumentu sei uza sistema manual, maibé hahú husi tinan 2015 to’o agora, instituisaun ne’e uza ona sistema dijitál.
Mudansa sistema ne’e permite funsionáriu sira halo rejistu no rai dadus dokumentu ho sistema informátiku, hodi fasilita prosesu servisu no buka informasaun kona-ba dokumentu sidadaun sira nian.
Kona-ba rekizitu atu trata sertidaun moris RDTL, nia hateten katak aplikante sira presiza aprezenta dokumentu relevante, inklui sertidaun batizmu no dokumentu hosi inan-aman, atu funsionáriu sira bele halo verifikasaun antes prosesu rejistu.
Enkuantu ba sidadaun sira ne’ebé hakarak trata Billete Identidade (BI), presiza aprezenta sertidaun moris RDTL no deklarasaun hosi xefe suku, nu’udar dokumentu apoiu atu kumpre rekizitu administrativu.
Bazeia ba dadus ne’ebé rejista iha sistema instituisaun nian, durante períodu refere, Notariadu Kovalima rejista ona sertidaun moris RDTL hamutuk 63.152 no Billete Identidade hamutuk 41.072.
Maski nune’e, dirijente ne’e rekoñese katak, iha implementasaun servisu loroloron, instituisaun ne’e sei hasoru limitasaun balu, liuliu falta transporte no orsamentu ne’ebé sai dezafiu ba funsionáriu sira atu hala’o atividade no fasilita atendimentu ba sidadaun.
“Hein katak entidade kompetente bele fó apoia adisionál, liuliu iha área transporte no orsamentu, atu hametin kapasidade institusionál no hadi’a kualidade atendimentu ba públiku,” nia garante.
Notisia relevante: Rejistu notariadu Covalima “print out” ona sertidaun RDTL 10.161
Jornalista: Celestina Teles
Editór: Florencio Miranda Ximenes

