ANM-Montaña Di’ak apoia materiál konstrusaun ba Prizaun Suai

KOVALIMA, 17 Novembru 2026 (TATOLI) – Autoridade Nasionál Minerál, Institutu Públiku (ANM, I.P.), hamutuk ho Empreza Montaña Di’ak Unipessoal, Lda, fó apoiu materiál konstrusaun ba Prizaun Suai, Munisípiu Kovalima, hodi suporta konstrusaun infraestrutura hakiak animál.
Materiál konstrusaun ne’ebé entrega mak hanesan simente, rai-henek no fatuk, atu uza ba konstrusaun fatin haki’ak fahi iha Prizaun Suai.
Prosesu haki’ak animál ne’e sei sai atividade produtiva ida ba prizioneiru sira hodi fó oportunidade atu aprende, hasa’e koñesimentu no abilidade foun, dezenvolve responsabilidade no prepara an atu integra fali iha família no komunidade hafoin kumpre sira-nia pena.
Diretór Ezekutivu ANM, I.P, David de Araújo, hateten katak apoia ne’e sai parte husi kontribuisaun instituisaun no empreza sira ba komunidade liuliu iha área reabilitasaun sosiál.
ANM, I.P, nu’udar instituisaun iha tutela Ministériu Petróleu no Rekursu Minerál, ne’ebé estabelese husi IX Governu Konstitusionál atu regula no superviziona empreza sira ne’ebé hala’o atividade esplorasaun no esplotasaun rekursu minerál iha territóriu nasionál.
Iha fatin hanesan, Reprezentante PAM Kovalima, ne’ebé mós Diretór Programa Nasional Dezenvolvimentu Suku (PNDS) Munisípiu Kovalima, Pedro Gomes de Araujo, Orgullu, tamba ANM, I.P, iha inisiativa ne’ebé konsege mobiliza empreza privadu fó apoiu ba Prizaun Suai.
“Ami agradese ba Diretór Ezekutivu ANM nia esforsu atu buka apoiu ba Prizaun Suai. Ho kolaborasaun ne’e, ami konsege hetan empreza ne’ebé iha vontade atu kontribui material konstrusaun, hanesan simentu, rai-henek no fatuk”,Pedro Gomes Orgullu afirma.
Diretór Prizaun Suai, Rui Gonçalves, konsidera katak, prosesu konstrusaun fahi luan sira presiza responsabilidade no kolaborasaun husi parte hotu, atu asegura katak sira bele muda sira-nia hahalok no prepara an atu fila fali ba sosiedade.
“Responsabilidade atu ajuda ita-nia maun-alin sira ne’ebé hela iha prizaun la’ós responsabilidade instituisaun prizaun nian mesak, maibé responsabilidade ita hotu nian. Ita presiza servisu hamutuk atu sira bele muda ba di’ak, hamenus violénsia no moris ho dame bainhira fila fali ba komunidade. Ita hakarak haree komunidade ida ne’ebé moris ho dame no hakmatek. Ida-ne’e mak ita-nia mehi, no ita husu Maromak nia tulun atu mehi ne’e bele sai realidade”, Rui Gonçalves afirma.
Notisia relevante:Governu Austrália manifesta kompromisu kontinua apoia PNTL
Jornalista: Celestina Teles
Editór: Florencio Miranda Ximenes

