Governu Austrália manifesta kompromisu kontinua apoia PNTL
DILI, 22 Outubru 2026 (TATOLI)–Vise Primeiru-Ministru no Ministru Defeza Austrália, Richard Marles, Governu Austrália kontinua manifesta nia kompromisu atu hametin kooperasaun ho Timor-Leste iha área seguransa.
“Orgullu tanba ohin bele marka vizita ida iha Komandu Jerál PNTL (Polísia Nasionál Timor-Leste). Ami sente orgullu bele sai parseiru ba Polísia Nasionál Timor-Leste, ne’ebé asina ona akordu husi Primeiru-Ministru na’in-rua, hahú hametin parseria ne’ebé hahú inisia iha tinan ida-ne’e,” Vise Primeiru-Ministru no Ministru Defeza Austrália, Richard Marles, hato’o hafoin hala’o vizita kortejia ba Kuartél Jerál PNTL, Kaikoli, Kinta ne’e.
Notísia relevante : Kontinjente Forsa Defeza Austrália no atleta ultra-maratona Jacqui Bell partisipa DIM 2026
Richard Marles hateten, horisehik Ministru Defeza Timor-Leste no Austrália asina akordu ida ho forsa Defeza, ne’ebé di’ak tebes atu hasa’e kapasitasaun forsa defeza nian.
“Ami mós asina akordu ida ba apoiu hasa’e kapasitasaun ba Polísia Nasionál Timor-Leste, hodi apoiu iha serbisu liuliu domíniu marrítima,” nia akresenta.
Nia dehan, kooperasaun ne’ebé Governu Austrália asina ho PNTL iha área prevensaun krime sibernétika.
“Atubele hasae koñesimentu no kapasidade iha sibernétika, liuliu foka ba dijitál forénsika nian, nomós hasae kapasidade iha preparasaun atu responde ba situasaun dezastre,” nia katak.
Ministru Defeza Austrália louva PNTL nia serbisu ne’ebé ho di’ak tebes.
“Imi halo serbisu ne’ebé kapas tebes ba imi-nia país, tanba ne’e ami hakarak hato’o obrigadu barak tebes ba ita-boot sira ba serbisu sira ne’ebé halo ona hodi kontribui ba ita-nia país,” nia hato’o.
Iha biban ne’e, nia mós agradese tanba bele halo vizita mai PNTL hodi bele hasoru malu ho PNTL hodi hametin kooperasaun ba oin.
Iha vizita ne’e, Vise Primeiru-Ministru no Ministru Defeza Austrália, Richard Marles ne’e Komandu PNTL inaugura mós fatin ba Sentru Komandu Insidente ka The Incident Command Center (ICC) ne’ebé apoia husi Australian Federal Police (AFP) liuhusi Timor-Leste Programme Devolopment Police (TLPDP) iha Timor-Leste.
Jornalista : Natalino Costa
Editora : Julia Chatarina
