Kontinjente Forsa Defeza Austrália no atleta ultra-maratona Jacqui Bell partisipa DIM 2026

DILI, 06 Agostu 2026 (TATOLI) – Kontinjente Forsa Defeza Austrália (ADF, sigla inglés) ho membru na’in-hitu, hamutuk ho korredór distánsia ultra-naruk Jacqui Bell, to’o ona Dili, liuhusi serbisu diretu Qantas Darwin, Dili, atu partisipa iha Maratona Internasionál Dili (DIM) 2026.

Diretór Eventu Korrida DIM, Sean Borell, hateten ekipa korrida ADF ho membru na’in-hitu ne’e sei hamutuk ho atleta sira seluk husi rejiaun Indo-Pasífiku iha liña hahú iha sábadu dadersán, 08 Agostu.

Tuir nia, iha momentu ne’ebé iha signifikadu simbóliku boot ba korrida tinan ne’e nian, tanba membru kontinjente ne’e sei halai hamutuk, kaba’as ba kaba’as, ho atleta sira husi FALINTIL-Forsa Defeza Timor-Leste (F-FDTL), iha ne’ebé forsa rua ne’e sei tuir perkursu hanesan ho bandeira amizade, saúde, no parseria ne’ebé metin entre Austrália no Timor-Leste.

“ADF no F-FDTL treina, hala’o misaun, no rekupera hamutuk iha operasaun sira iha rejiaun laran tomak”, Sean Borell relasa.

Nia dehan hamutuk ho korredór ADF sira mak Jacqui Bell nu’udar atleta ultra-distánsia Austrália nian ne’ebé rekoñesidu tebes nu’udar ema foinsa’e ida ne’ebé konsege kobre maratona ultra-etapa oin-oin iha kontinente hitu.

Jacqui Bell, ne’ebé kontinua uza korrida distánsia naruk nu’udar plataforma ba advokasia saúde mentál nian, sei profisiona iha programa maratona tinan ne’e nian no sei fó entrevista ba mídia sira molok dadeer korrida nian. Ninia partisipasaun ne’e sai posivel liuhusi parseria entre Market Development Facility (MDF) no Maratona Internasionál Dili 2026.

Interese DIM ba edisaun 2026 ne’e sa’e beibeik iha semana hirak liubá, ho média nasionál sira iha Timor-Leste, Austrália, Indonézia no Portugál konfirma kobertura luan no tranzmisaun direta. Rádiu Televizaun Timor-Leste (RTTL) mak halo tranzmisaun direta, ne’ebé asesu iha televizaun terrestre nomós streaming iha ninia plataforma dijitál.

Tuir nia, ida-ne’e sei sai fali emisór ofisiál doméstiku, hodi marka tinan daruak tuituir malu ba kobertura live kompletu husi liña hahú to’o korredór ikus liu ne’ebé hakat liña xegada.

“Semana korrida nian iha Dili agora sente hanesan momentu nasionál ida. Tinan-tinan, kobertura tranzmisaun nian aumenta boot, no estrada sira nakonu ho ema sira ne’ebé mai la’ós de’it atu halai, maibé atu asiste no sai parte husi eventu ne’e”, nia dehan.

Tema DIM tinan ne’e mak “Hadomi Ita-nia Ai-Laran no Balada Fuik Sira”, liga ba parte hothotu iha semana korrida nian, serimónia kuda ai-oan komunitáriu ne’ebé liga ho lansamentu ofisiál eventu nian, no iha tempu hanesan, foti bib (xapa korrida) komesa mós Semana Matak, programa ida ne’ebé halibur grupu diskusaun no painél sira kona-ba tema konservasaun, protesaun ambientál no sustentabilidade.

Maratona Internasionál Dili sempre sai nu’udar korrida ne’ebé iha signifikadu boot liu fali marka de’it ninia tempu. Tinan ne’e, ho kontinjente forte husi Austrália ne’ebé to’o ona hamutuk ho ita-nia parseiru sira husi F-FDTL, ho Jacqui Bell ne’ebé lori ninia istória estraordinária kona-ba rezisténsia no rekuperasaun.

“Relasaun amizade entre ita-nia forsa defeza sira, ita-nia Programa Kooperasaun Defeza Austrália nian no komunidade veteranu sira mak amizade ne’ebé loloos, nonook, no iha valór kle’an, no ami orgullu atu hatudu amizade ne’e iha estrada iha sábadu dadeer”, Borell hatete.

Maratona Internasionál Dili mak eventu halai iha estrada distánsia naruk ho dezempeñu boot tebes iha Timor-Leste, ne’ebé halibur hamutuk korredór rekreasionál, maratonista elite, kontinjente defeza rejionál, ekipa komunitária no atleta vizitante sira husi rejiaun Indo-Pasífiku tomak.

Edisaun DIM 2026 ho kategoria maratona kompletu, meia-maratona, 10 km, no distánsia komunitáriu no nakloke ba públiku mak fun run 5 km.

Regresu ne’e taka kampaña promosaun mídia nian ne’ebé hala’o daudaun ba eventu tinan ne’e nian, ne’ebé lori tema ofisiál “Hadomi Ita-nia Ai-Laran no Balada Fuik Sira.” Kobertura sei tranzmitidu diretu mós ho parseiru tranzmisaun internasionál no repórter sira iha fatin ne’ebé pozisionadu ona iha liña hahú, liña xegada, no korredór ba floresta nian iha prekursu hothotu.

Jornalista: Arminda Fonseca 

Editora: Maria Auxiliadora