Top

SIP detein suspeitu na’in-rua hatama sigarru no fogete ilegál

PNTL Kovalima halo identifikasaun sek iha komandu PNTL Munisípiu Kovalima. Foto TATOLI/Celestina Teles.

KOVALIMA, 17 Novembru 2026 (TATOLI) – Komandu Polísia Nasionál Timor-Leste (PNTL), liuhusi Servisu Intelejénsia Polisiál (SIP), konsege detein no halo apreensaun ba suspeitu na’in-rua ho inisiál ABP no EM tanba shatama sasán kontra bandu, hanesan sigarru ho marka Pohon Sagu hamutuk falun 445 no fogete falun 480, iha area Cendana II, Suku Debos, Postu Administrativu Suai, Munisípiu Kovalima.

Suspeitu na’in-rua ne’e detein iha loron 17 Novembru 2026, maizumenus tuku 13:30 lokraik, bainhira lori sasán kontra bandu liuhusi dalan Postu Administrativu Tilomar atu tama ba Postu Administrativu Suai, Munisípiu Kovalima.

Operasaun ne’e hala’o nu’udar parte husi esforsu Servisu Intelejénsia Polisiál atu kontrola no kombate atividade komérsiu ilegal, liuliu sasan kontrabandu ne’ebé tama territóriu Timor-Leste liuhusi dalan la autorizadu.

Hafoin  detein, Komandu PNTL Munisípiu Kovalima, liuhusi Seksaun Investigasaun kontinua prosesu identifikasaun no investigasaun hodi determina sira-nia responsabilidade tuir prosedimentu no lei ne’ebé vigora. Sasán ne’ebé autoridade konfiska inklui sigarru falun 445 no fogete falun 480.

PNTL kontinua halo esforsu atu hametin kontrolu iha área fronteira no kombate atividade ilegal sira hodi asegura seguransa no kumprimentu lei iha territóriu Timor-Leste.

Jornalista: Celestina Teles

Editór: Florencio Miranda Ximenes

Publisidade

Leave a Reply

Latest Post

error: Content is protected !!