Aplikante ba vaga membru foun PNTL hahú teste médiku

DILI, 13 Novembru 2026 (TATOLI)—Komisaun Rekrutamentu ba vaga membru Polísia Nasionál Timor-Leste (PNTL) fó sai katak, Sesta ne’e, ekipa responsável hahú fó teste médiku ba aplikante sira.
Antes ne’e, Komisaun fó sai rezultadu iha loron 30 Outubru 2026, katak iha ema na’in-562 mak liu iha prova kulturál, ho nune’e bainhira ekipa konfere dadus referidu ho dadus teste psikolojia ne’ebé iha juri Guarda Nasionál Repúblikana (GNR), katak iha aplikante 491 mak admitidu iha teste psikolojia.
Teste médiku realiza durante loron-10, hahú iha loron 13 to’o 22 Outubru 2026.
Prezidente ba Komisaun Rekrutamentu membru foun PNTL, Komisáriu Asistente Polísia José Soares, hateten, ohin tama iha faze datoluk, ne’ebé aplikante sira sei halo biometru.
“Tuir loloos ita halo iha munisípiu maibé agora ita hahú foun fali hodi halo reverifikasaun, liuliu atu sukat kandidatu nia altura ho todan,” Komisáriu Asistente Polísia José hato’o iha abertura teste médiku iha Sentru Formasaun Polísia, Komoro.
Nia dehan, ekipa hotu ne’ebé envolve iha teste ne’e hakarak promove transparánsia, laiha deskriminasaun no oportunidade hanesan.
“Ita hakarak rekrutamentu ne’ebé kualidade nune’e nia rezultadu di’ak no kredível iha Timor-Leste. Ha’u hateten ba imi, ha’u hatutan informasaun ne’ebé mak Ministru fó no ko’alia ona, rekrutamentu la’ós mak tinan ida-ne’e de’it. Sira ne’ebé la pasa iha tinan ida-ne’e prepara an didi’ak, estuda, hadi’a imi-nia ezersísiu nune’e iha tinan oin mai imi bele pasa,” nia akresenta.
Notísia relevante : Aplikante 11.391 vaga membru PNTL hahú submete ba prova kulturál
Nia kongratula ba aplikante sira ne’ebé liu iha faze prova kulturál no prova psokolojia.
“Agradese kuandu imi pasa hotu, mantein kontente nafatin ba sira ne’ebé mós la pasa. Keta atu haksoit tun atu haksoit sa’e bá tama iha debu ruma halo imi foer fali, imi-nia futuru sei naruk, Estadu Timor-Leste no PNTL presiza ema atu sai Polísia Nasionál Timor-Leste maibé tuir rekezitu ne’ebé mak determina iha lei,” nia hatutan.
Ohin Komisaun Rekrutamentu halo teste médiku ba kandidatu hamutuk-125 husi munisípiu neen hanesan Aileu Ainaru, Ataúru Baukau, Bobonaru no Kovalima.
“Sei halo teste tolu, teste médiku ida halo reverifikasaun ba sukat sira-nia altura ho sira-nia todan no depois médiku sira sei haree teste sira seluk hanesan ekagen, haree tato, sira sei halo iha ne’e no depois aban ita sei kontinua fali ba teste iha Ospitál Nasionál, tanba ohin labele halo iha Sentru Formasaun. Tanba ne’e ekipamentu pezadu labele lori mai no teste hanesan sukat sira-nia altura no todan inklui sira-nia tato ne’e halo iha Sentru Formasaun,” Prezidente Komisaun hato’o.
Komisaun identifika iha teste médiku ne’e iha aplikante balun mai atraza maibé sei tolera. Aban teste médiku sira seluk ne’ebé halo iha HNGV hanesan roncent, teste ran no sira seluk tuir nia oráriu.
Nota mós katak, iha aplikante balun la satisfáz tanba iha teste prova kulturál ne’e sira hetan valór 70, maibé ba prova psokolojia sira-nia naran la sai, nune’e Komisaun hato’o ona iha tempu liubá.
Teste médiku ne’e hetan akompañamentu husi ekipa fikalizaun no monitrizaun Komisaun Antí-Korrupsaun, Provedoria Direitu Umanu no Justisa, Komisaun Funsaun Públika, Fundasaun Mahein, Prezidénsia Repúblika, Parlamentu Nasionál no Governu.
Prova kulturál ne’e nu’udar prova finál, ne’ebé aplikante admitidu iha faze ne’e sei kontinua ho formasaun.
“Maibé teste saúde hotu ita sei aprezenta rezultadu ba Governu, ikus ne’e hira ita sei hato’o ba Ministru ne’ebé iha kompeténsia atu deside buat balun,” Komisáriu Asistente Polísia José esplika.
Kandidatu sira iha Janeiru sei hahú formasaun no sei kontinua to’o Marsu.
“Abríl kona-ba iha eleisaun ne’e normalmente Komandu Jerál sei disponibiliza kandidatu sira hodi fó apoiu iha munisípiu sira hodi asegura Eleisaun Prezidensiál,” nia subliña.
Jornalista : Natalino Costa
Editora : Julia Chatarina

