MJDAK aloka rihun $5 ba Sentru Juventude Kovalima komemora loron 12 Novembru
KOVALIMA, 10 Novembru 2026 (TATOLI)– Ministériu Juventude, Desportu, Arte no Kultura (MJDAK),parseiru ho Sentru Juventude Kovalima (CJK), aloka orsamentu hamutuk $5.000 atu apoia realizasaun atividade sira hodi komemora loron 12 Novembru no loron Nasional Juventude iha munisípiu Kovalima.
“MJDAK aloka orsamentu $ 5000 husi orsamentu ne’e kada postu administrativu ita alokasaun orsamentu $650 atu finansia atividade sira ne’ebé komisaun organizadora prepara iha kada postu hodi selebra loron nasionál juventude no loron 12 Novembru“, Diretór Ezekutivu Sentru Juventude Kovalima, Julio Ferreira,relata ba TATOLI iha Centru Juventude Kovalima Kampung Baru.
Iha ámbitu komemorasaun loron Nasional Juventude no loron 12 Novembru, sei hala’o atividade prinsipál haat, inklui diskursu públiku iha lian Inglés no Portugés ba juventude, servisu sosial, reflesaun no semináriu. Aleinde ne’e, sei realiza mós misa, tau ai-funan no sunu lilin nu’udar parte husi atividade komemorativa.
Komisaun organizadora iha kada postu administrativu mak sei responsabiliza ba preparasaun no ezekusaun atividade, inklui organiza kompetisaun no fó prémiu ba partisipante sira ne’ebé hetan klasifikasaun di’ak.
Ba kompetisaun diskursu públiku, komisaun organizadora prepara prémiu osan ba vensedór sira, hanesan $25 ba manan nain dahuluk, $20 ba daruak, $15 ba datoluk, $10 ba da haat. Enkuantu membru juri sira sei simu kompensasaun $10.
Bazeia ba planu ne’ebé MJDAK aprova ekipa juri sei mai husi reprezentante sosiedade sivíl atu halo avaliasaun no determina rezultadu kompetisaun diskursu públiku.
Aleinde ne’e, komisaun organizadora iha kada postu administrativu sei haruka konvite ba eskola sira, xefe suku no administradór postu atu partisipa no apoia atividade komemorativa ne’e.
Sentru Juventude Kovalima sei asume papél monitorizasaun ba implementasaun atividade sira iha postu administrativu Fatululik, Fatumea,Fohorem, Tilomar, Maucatar, Suai no Zumalai.
Notisia relevante:Governu aloka US$20.000 ba komemorasaun Loron Nasionál 12 Novembru iha Santa Krúz
Jornalista: Celestina Teles
Editór: Floréncio Miranda Ximenes
