Autoridade Kovalima orienta Ofisiál Suku na’in-60 prenxe formatu dadus sosiál

KOVALIMA, 19 Novembru 2026 (TATOLI) – Autoridade Munisipál Kovalima, liuhosi Servisu Munisipál Apoia ba ONG no Organizasaun Komunitária, fó orientasaun ba ofisiál suku na’in-60 atu prenxe formatu padraun ba rekolla no rejistu dadus asuntu sosiál iha nivel suku.
Atividade ne’e envolve reprezentante na’in-rua husi kada suku mak funsionáriu asuntu sosiál no sekretária administrasaun suku, ho objetivu atu hametin kapasidade sira iha prosesu rekolla, rejistu no atualizasaun dadus benefisiáriu asisténsia sosiál.
“ Tanba ne’e, Ha’u husu funsionáriu asuntu sosiál iha suku atu hala’o sira-nia knaar ho responsabilidade, disiplina no seriedade, hodi asegura informasaun ne’ebé rekolla bele reflete situasaun real iha komunidade” Sekretáriu Munisipál Asuntu Sosiál no Organizasaun Komunitária, Filomeno Cardoso hato’o liuhusi nia diskursu iha salaun AMC.
Rejistu dadus ne’ebé la kompletu bele afeta prosesu planeamentu no tomada desizaun kona-ba asisténsia sosiál, tanba ne’e funsionáriu sira presiza atualiza informasaun regularmente.
Iha parte seluk, Diretora Servisu Munisipál Apoiu ba ONG no Organizasaun Komunitária, Maria de Jesus Pereira, hateten katak, formatu padraun ne’e kria atu fasilita servisu ofisiál suku sira, liuliu iha prosesu rekolla no rejistu dadus ho sistema uniforme.
“Ho formatu ne’ebé ami kria ona, funsionáriu asuntu sosiál no sekretária administrasaun suku bele rekolla no prenxe dadus ho maneira uniforme, atu informasaun hotu organiza ho padraun ida de’it”, Maria de Jesus Pereira afirma.
Dadus ne’ebé rekolla ho sistema padraun ne’e sei fasilita Autoridade Munisipál Kovalima atu prepara relatóriu ne’ebé kompletu no atualizadu, hodi aprezenta ba Prezidente Autoridade Munisipál no ministériu relevante sira bainhira presiza.
Kriasaun formatu ne’e responde ba difikuldade ne’ebé akontese durante prosesu rekolla dadus iha suku, tanba informasaun balun seidauk kompletu no la atualiza tuir kondisaun real iha komunidade.
Ho orientasaun no utilizasaun formatu padraun ne’e, Autoridade Munisipál Kovalima hein katak prosesu rekolla dadus asuntu sosiál iha suku sei sai organizadu, sistemátiku no efetivu, hodi apoia planeamentu no hadi’a distribuisaun asisténsia ba sidadaun sira ne’ebé presiza.
Jornalista: Celestina Teles
Editór: Florencio Miranda Ximenes

