BAUCAU, 03 janeiru 2023 (TATOLI) – Konsellu Munisipál Kombatente Libertasaun Nasionál (CMCLN, sigla portugés) Baucau, husu ministériu justisa konsidera pedidu atu rezolve polémika rai iha área Caidile-lale, suku Bucoli, postu administrativu Baucau Vila tanba atu konstrui monumentu saudozu Vicente Reis ‘Sahe’.
Sekretáriu jerál CMCLN Baucau, Manuel ‘Alari’ da Costa Soares, esplika, autoridade suku Bucoli hamutuk ho konsellu veteranu Baucau hato’o ona pedidu ba ministériu justisa no terra propriedade nasionál atu direitamente to’o iha terrenu hodi hamutuk ho komunidade buka solusaun ba polémika rai iha área Caidile-lale nune’e futuru harii monumentu ba saudozu Vicente Reis ‘Sahe’.
“Ita husu ba terra propriedade liuliu Ministéiru Justisa nu’udar autoridade haree kona-ba asuntu ne’e, sé bele fó atensaun, tanba Sahe nu’udar eroi no patrimóniu estadu,” Sekretáriu jerál CMCLN Baucau hateten iha Vila Antiga, sesta ne’e.
Alari argumenta, problema refere akontese fulan-neen ona maibé parte MJ seidauk delega ekipa hosi nasionál atu direitamente buka solusaun ba kazu disputa entre komunidade no autoridade suku.
Autoridade suku Bucoli konsidera rai refere nu’udar patrimóniu suku nune’e hamutuk ho família no konsellu veteranu Baucau planeia atu konstrui sítiu istóriku sentru pilotu númeru rua ponta leste akumula ho monumentu Sahe ne’ebé konsidera sai fatin inísiu funu antes kontinua ba fatin seluk.
“Prosesu ne’e kleur ona, ami hamutuk ho autoridade suku inklui terra propriedade munisípiu hato’o ona dokumentu no kronolojia polémika rai ba nasionál, sira-nia prejensa mak fó solusaun maibe to’o agora seidauk iha asaun ruma,” Alari akresenta.
Konsellu veteranu Baucau hato’o ona proposta ba nasionál hodi apoia fundu purvolta orsamentu rihun $400-resin ne’ebé sei utiliza ba programa rua hanesan hadi’a fatin abrigu saudozu komandante David Alex ‘Daitula’ iha suku Caibada inklui konstrusaun monumentu Sahe iha Bucoli.
Konsellu veteranu mos hato’o proposta ba adminkstrasaun munisípiu Baucau hamutuk $ 1.500 hodi utiliza ba indemnizasaun rai inklui prepara dezeñu no Bill of Quantity (BoQ) ba monument refere.
Alende ne’e, Ministéiru Turismu, Komérsiu no Indústria ne’ebé prevé orsamentu ba tinan-2023 hamutuk $160.000 hodi apoia konstrusaun dezenvolvimentu instalasaun sítiu turístiku iha Timor-leste.
Bainhira rai refere rezolve sei haloot mós restu mortál saudozu Vicente Reis ‘Sahe’ ho saudoza Wewe ne’ebé durante ne’e rai iha rezidénsia família iha Bucoli ne’ebé monumentu refere sai sentru istória funu iha ponta leste inklui sai sentru estudu ba jerasaun foun sira atu aprende.
Jornalista : Natalino Belo
Editór : Evaristo Soares Martins
