DILI, 24 fevereiru 2023 (TATOLI)—Ministru Asuntu Kombatente Libertasaun Nasionál (MAKLN), Júlio Sarmento”Meta Mali”, hateten to’o agora Governu haloot ona restu mortál hamutuk 2.000-resin iha territóriu nasionál.
Notísia Relevante: MAKLN sei haloot restu mortál 3.740-resin iha 2023
“Restu mortál ne’ebé ita haloot ona ne’e hamutuk 2.000, ne’e hosi Same, Aileu, Baucau iha postu administrativu Quelicai no Laga nian. Maibé Laga iha fatin rua, fatin ida ita haloot no restu mortal hamutuk 133 mak seidauk haloot,” Meta Mali hateten ba Agência Tatoli iha nia kna’ar fatin Caicoli, kinta ne’e.
Meta Mali haktuir, hosi munisípiu Manatuto-Natarbora nian mak sei barak, depois Ermera, Ainaro, tuir fali iha fatin rua mak Bobonaro rasik no ida seluk iha Maliana, Viqueque nian iha Watulari, Lautém iha Ilomar no Covalima nian iha parte Suai mak seidauk haloot.
“Restu mortál iha fatin refere ne’e ita mós sei presiza kompañia maibé ida-ne’e nia prosesu mós lori tempu naruk. Dala ruma to’o fulan neen, entaun ita sei labele halo buat ida, inklui restu mortál sira liu 10-resin ne’ebé sei rai iha osuáriu Metinaro nian. Loloos ita haloot ona maibé agora besik kampañia eleitorál no tama eleisaun, entaun ita labele halo buat ida ho ansi to’o ikus ema haree laiha kualidade mak sei ko’alia ka dala ruma ema dehan hadau votu,” Meta Mali hateten.
Tanba ne’e, nia dehan, MACLN laiha planu atu haloot restu moráal sira iha fatin ne’ebé mensiona iha leten ne’e, iha tinan ida-ne’e nia laran.
Restu mortál ne’ebé halibur dezde tinan 2008 to’o agora ne’e hamutuk 14.000, maibé to’o agora Governu foin mak haloot 2.000-resin.
Notísia Relevante: Orsamentu Retifikitavu millaun $2,5, MAKLN sei halibur-haloot restu mortál
Jornalista : Osória Marques
Editór : Cancio Ximenes
