COVALIMA, 25 abríl 2023 (TATOLI)–Komandante Eskuadra Postu Administrativu Suai, munisípiu Covalima, Inspetór Xefe Polísia Juaquim da Costa, husu sidadaun sira atu kumpre regra ne’ebé estabelese ona durante iha periódu kampaña eleitorál.
“Parte seguransa durante períodu kampaña eleitorál ema hotu livre atu partisipa, ha’u nafatin husu atu ita labele sees hosi lei no regra hirak ne’ebé iha. Maske fó liverdade ba ita atu envolve atividade polítika maibé nafatin kesi ho lei ka regulamentu, nune’e labele hamosu dezentendementu ita ho sira no autoridade liu-liu membru seguransa,” Inspetór Xefi Polísia Juaquim da Costa hato’o liuhosi nia diskursu bainhira partisipa iha serimónia lansamentu kuda ai-parapa iha suku Suai Loro, tersa ne’e.
Tanba ne’e, nia dehan, membru PNTL sira loro-loron hala’o servisu hodi hala’o patrollamentu tama-sai bairru sira, nune’e atu garante sidadaun sira moris hakmatek iha sira-nia bairru laran.
“Agora, ita iha prosesu nia laran, loro-loron halo ami-nia asaun polisiamentu hodi hala’o patrollamentu tama-sai bairru sira, nune’e ema hotu sente hakmatek nafatin,” nia dehan.
Entertantu, iha loron 13 fulan-marsu tinan 2023 ne’e, Prezidente Repúblika José Ramos Horta dekreta loron eleisaun ne’ebé sei akontese iha loron 21 fulan-maiu tinan 2023.
Bazeia ba kalendáriu ne’ebé Komisaun Nasionál Eleisaun (CNE-sigla portugés) aprova, partidu polítiku sira hahú hala’o kampaña eleitorál iha loron 19 fulan-abríl ne’ebé sei ramata iha loron 18 fulan-maiu tinan 2023 ne’e.
Dadaun ne’e, partidu polítiku ne’ebé mak hala’o ona kampaña eleitorál iha munisípiu Vovalima mak hanesan Partidu Dezenvolvimentu Nasionál (PDN), Partidu Os Verdes de Timor (PVT), Partidu Democrata Cristão (PDC), Partidu FRETILIN, Partidu Repúblikanu (PR) no partidu UDT ne’ebé kansela nia atividade kampaña eleitorál iha munisípiu Covalima.
Jornalista : Celestina Teles
Editór : Cancio Ximenes
