PNTL detein sidadaun estranjeiru na’in-53 iha fatin lahanesan suspeitadu atividade scam
DILI 09 Jullu 2026 (TATOLI)–Polísia Nasionál Timor-Leste (PNTL) liuhusi Diresaun Servisu Investigasaun Kriminál (DSIK), Kuarta ne’e, detein sidadaun na’in-53 ne’ebé suspeitadu halo atividade online scam no online game.
Autoridade Seguransa detein sidadaun estranjeiru sira iha fatin la hanesan, iha Kuarta (08/07) purvolta 12:00 detein na’in-29 kompostu husi xineza na’in-28 no kambodianu na’in-ida. Ekipa bainhira halo pasa revista deteta katak uma ida-ne’ebé sira aluga iha área Maneleuna, Aldeia Lamkari, Suku Manleuana ne’e sai fatin ba sidadaun estranjeiru sira halo atividade ilísitu.
Bainhira Polísia sobu fatin ne’e, sidadaun sira ne’e balun subar-an maibé konsege deteta no asegura sasán sira ne’ebé sira uza halo atividade.
“Hafoin pasa revista ba estranjeiru sira ne’e, Polísia kaptura sira no lori mai Diresaun Nasionál Investigasaun Kriminál. Evidénsia sira ne’ebé mak ita iha fatin ne’ebá mak telefone hamutuk 60, tablet marka Samsung rua, reuter tolu, komputadór hamutuk 32 no osan cash hamutuk $5.632. Pasaporte ne’ebé ita asegura 29 kompletu,” Diretor Servisu Investigasaun Kriminál, Superintendente Xefe Polísia João Belo relata liuhusi konferénsia imprensa ne’ebé hala’o iha Kuartél Jerál PNTL, Kaikoli, Kinta ne’e.
Notísia relevante : PNTL asegura sidadaun estranjeiru na’in-29 iha Manleuana suspeitadu online scam
Nia esplika, Autoridade Seguransa aplika prosedimentu legál ba sidadaun estranjeiru sira hanesan identifikasaun normál no sira daudaun ne’e hetan detensaun durante 72 iha sela Dom Aleixo.
“Ami sei aprezenta ba Ministeriu Públiku hodi prosesa ba Tribunál. Suspeitu sira ne’e maioria mai ho vistu turista. Maibé ita sei halo identifikasaun kle’an liután atubele hatene maizumenus sira ne’ebé overstay ona karik balun keta halo violasaun ruma ita sei identifika ba iha ne’ebá,” nia akresenta.
Liu tia ne’e, iha Kinta ne’e, bainhira Polísia halo hela operasaun iha parte Metiaut, deteta xineza hamutuk 24 halo atividade hanesan, nune’e daudaun iha ona DSIK.
“Sira ne’e halo atividade hanesan, atividade scaming call center. Polísia identifika liuhusi matéria ne’ebé sira uza, fatin ne’ebé sira uza no modu operasaun ne’ebé hanesan,” Superintendente Xefe Polísia, João Belo dos Reis, akresenta.
Aleinde ne’e, Polísia halo hotu identifikasaun ba uma-na’in, nune’e husu ba públiku atu vijilánsia liután bainhira iha ema husu atu aluga uma.
“Mensajen husi Polísia Nasionál Timor-Leste ba uma-na’in hotu-hotu, sidadaun hotu-hotu ne’ebé nia uma fó aluga ba ema karik atu kuidadu didi’ak tanba dalaruma ema estranjeiru sira uza fali uma privadu ne’ebé sira aluga ba atividade call center,” nia katak.
Nia dehan, Polísia daudaun ne’e halo hela koordenasaun ho parseiru internasionál hanesan Austrália no Indonézia, inklui nasaun sira seluk ho esperiénsia hanesan atu ajuda rekolla informasaun no halo investigasaun kle’an ba asuntu ne’e.
“Ita serbisu maka’as hela atu deteta sira-nia movimentu tanba balun eskapa sai ona husi fatin ne’ebá bainhira ita halo intervensaun, ita fó ona informasaun ba Servisu Migrasaun para deteta sira bainhira sira halai sai husi ita-nia teritoriu Timor-Leste,” nia subliña.
DSIK no Servisu Migrasaun daudaun halo hela koordenasaun serbisu no komunikasaun di’ak.
“PNTL liuhusi Diresaun Servisu Investigasaun Kriminál reafirma ami-nia kompromisiu atu kombate krime ho tipu transnasionál, krime organizadu, krime sibernétika mesmu ke ho limitasaun oinoin ne’ebé ita infrenta, maibé reafirma katak ita sei la fó fatin ba krime Organizadu sira la’o iha ita-nia nasaun,” Diretór tenik.
PNTL rejista ona kazu ne’e ho NUK 0240/26.PNSIK iha Ministériu Públiku.
Jornalista : Natalino Costa
Editora : Julia Chatarina
