DILI, 08 Jullu 2026 (TATOLI)–Polísia Nasionál Timor-Leste (PNTL) liuhusi Diresaun Servisu Investigasaun Kriminál (DSIK) hamutuk ho Servisu Migrasaun no komunidade intelejénsia sira asegura sidadaun estranjeiru na’in-29 iha Aldeia Lemokari, Suku Manleuana, Postu Administrativu Dom Aleixo, Munisípiu Dili.
Sidadaun sira ne’e kompostu husi kambodianu na’in-rua no xineza na’in-27.
DSIK simu informasaun husi ekipa sekretu katak sidadaun estranjeiru na’in-29 ne’ebé aluga Timoroan nia uma iha área Manleuana suspeitadu halo atividade ilísitu online scam iha fatin ne’e.
Nune’e, ohin maizumenus tuku 12:00, Autoridade Seguransa halo kedan buska ba uma ne’e no hetan duni katak sidadaun estranjeiru sira halo duni prátika online scam.
Ekipa asegura kedan sidadaun sira no lori kedan bá DSIK Komandu Jerál PNTL Kaikoli hodi halo identifikasaun.
Notísia relevante : Kazu scam call center, MP alega arguidu D ho prizaun preventiva
Iha buska no apreensaun ne’e, Autoridade Seguransa konsege halo apreensaun sasán hanesan telemóvel, laptop, tablet ida no rede starlink ne’ebé sidadaun sira ne’e uza hodi halo atividade ilísitu.
Uma-na’in, Duarte Felicidade ne’ebé sidadaun estranjeiru sira aluga nia uma haktuir, nia parte selebra kontratu ho sidadaun estranjeiru sira iha loron 08 Maiu maibé sira hahú hela iha uma iha Fulan-Juñu.
Duarte haktuir, iha asina kontratu ne’e sira deklara katak sira mai atu serbisu iha projetu konstrusaun iha Sentru Konvensaun Internasionál, nune’e uma-na’in fó fatin ba sira aluga.
“Atividade ne’e ha’u la hatene ida, tanba uma ne’e mamuk hela no xineza ida mai husu atu aluga, entaun ha’u fó sira aluga. Kuandu ami asina kontratu iha ha’u-nia uma, ami la asesu ona mai iha uma ida-ne’e, ne’ebé ami hanoin dehan sira mai hela tanba sira hatete katak ema sira mai atu serbisu iha projetu konvesaun iha Tasi-ibun ne’e. Mais ohin Polísia ba bolu fali ha’u iha uma ha’u mós foin hakfodak fali katak sira halo atividade seluk ida iha ne’e,” Uma-na’in hato’o ba Jornalista sira iha Manleuana, Kuarta ne’e.
Nia dehan, uma ne’e sira asina kontratu ba tinan-liam no sira selu kada fulan-neen, kada-fulan ho montante $4.500.
“Osan ami simu ona iha Fulan Maiu ne’e,” nia katak.
Maski nune’e, uma-na’in kontinua koopera ho Autoridade Seguransa bainhira presiza informasaun kona-ba uma no kontratu.
“Ohin PNTL ba bolu ha’u mai koopera no kuartu balun ne’ebé sira xave loke ladi’ak PNTL, husu ha’u autoriza atu sobu nune’e bele hatene saida mak iha laran tanba ita hotu moris iha lei nia okos ita tenke koopera,” nia tenik.
Nia dehan, ladún di’ak bainhira xineza sira kontinua loke atividade ilegál ne’e iha Timor-Leste, tanba ne’e aktu krime ladi’ak.
“Ha’u sente ladi’ak bainhira xineza sira mai halo atividade ilegál iha ita-nia rai tanba ida-ne’e krime no ema fó sai beibeik ona katak ne’e ladi’ak, entaun ita mós tenke evita buat sira-ne’e. Mais momentu ne’e mak sira husu uma atu aluga loke atividade ida-ne’e karik ha’u la fó uma ba sira atu aluga,” Uma-na’in hatutan.
Ministériu Públiku daudaun ne’e autoriza ona DSIK atu halo identifikasaun ba sidadaun estranjeiru sira ne’e.
Jornalista : Natalino Costa
Editora : Julia Chatarina
