DILI, 04 maiu 2023 (TATOLI) – Kooperativa Kréditu Uniaun-Rai Osan Hamutuk Liberta Ki’ak (CU-ROHALIK), seidauk to’o tinan rua, akumula ona rendimentu hamutuk $45.000,00.
CU-ROHALIK estabelese iha dia 9 outubru 2021, no konsege halibur ona membru hamutuk 186 kompostu husu mane 72, no feto 114.
Prezidente CU-ROHALIK, Mario Madeira Soares haktuir katak CU-ROHALIK inísia husi dosente na’in lima (Cinco Irmãos) iha East Timor Coffee Institute (ETCI) ho fundu inísiu $600.
“CO-ROHALIK hetan fundu uitoan husi Sekretáriu Estadu Kooperativa (SEK) hodi fó apoiu osan $1,190 ba realiza aktivaidae treinamentu báziku kona-ba oinsá jere kooperativa ba oin,” Mario ba Tatoli, iha ETCI, Glenu, Ermera, kinta ne’e.
Ezekutivu CO-ROHALIK ne’e haklean katak objetivu husi kooperativa ne’e rasik atu ajuda maluk sira hodi kontribui ba hamenus no halakon ki’ak iha munisípiu Ermera.
“Ita foin mak harii tinan ida ho balun, maibé ita kosege halibur ona membru hamtuk 186 no akumula ona osan hamutuk $45.000,00 resin. Kompara ho kooperativa Kréditu Uniaun seluk iha Timor laran tomak, CU-ROHALIK avansa tebes no hatudu rezultadu signifikativu,” Prezidente CU-ROHALIK akresenta.
Responsável másimu ne’e informa CU-ROHALIK fó kréditu ki’ik liu mak $100 ho funan 3% ka $3, no kréditu másimu mak $500.
“Ita mós iha planu atu fó kréditu motor beat ba membru sira ne’ebé mak hakarak halo kréditu motor. Entaun, kooperativa sei komesa fó kréditu motor 10, ne’ebé mak ita sei hahú ho funsionáriu ETCI,” jerente ne’e akresenta.
Nia dehan, baze fundamentu ba se de’it mak hakarak asesu ba kréditu, rekézitu primeiru mak tenke sai membru uluk.
Mario informa katak atu sai membru foun CU-ROHALIK, kada individu tenke hatama osan $130 kompostu husi osan membru $100, osan-fulan kada membru $5, no osan rejistrasaun membru $25.
Jornalista : Filomeno Martins
Editora : Nelia Borges
