DILI, 12 juñu 2023 (TATOLI)–Ezekusaun reál Orsamentu Jerál Estadu (OJE) 2023 ba Todo Governo, esklui kompromisu no obrigasaun sira to’o loron 11 juñu, ein termu nominál atinje ona millaun $461,7, hosi orsamentu aprovadu biliaun $2,16.
“Atualiza ezekusaun orsamentál ba Primeiru-Ministru to’o iha 11 juñu ezekusaun Orsamentu Jerál Estadu 2023 sa’e ba 25,5% kontempla ho obrigasaun sira ne’e, signifika ita-nia orsamentu ezekutadu ne’e atenje 33%, karik to’o finál mandatu bele to’o 38%, ne’e previzaun de’it,” Ministru Finansa, Rui Gomes, informa hafoin relata progresu servisu ba Xefe Ezekutivu iha Palásiu Governu, segunda ne’e.
Notísia relevante : Ezekusaun reál OJE 2023 atinje millaun $438,2 to’o 31 maiu
Ezekusaun reál OJE 2023 iha inísiu semestre dahuluk ba Administrasaun Sentrál ein termu nominál atinje ona millaun $446,6, hosi totál orsamentu alokadu biliaun $1,8. Enkuantu Autoridade Rejiaun Administrativa Espesiál Oé-cusse (RAEOA) ezekuta ona millaun $15,2 hosi orsamentu alokadu millaun $120.
Nune’e, Ezekusaun OJE 2023 iha Administrasaun Sentrál a’as liu mak iha liña ministeriál ne’ebé ezekuta ona millaun $334,6 hosi orsamentu alokadu biliaun $1,2, tuir kedan ho Ajénsia Autónoma ho nia ezekusaun atinje ona millaun $6,6 hosi orsamentu alokadu millaun $218,3.
Enkuantu, Autoridade Munisipál ezekuta ona millaun $34,8 hosi orsamentu alokadu millaun $81,3, Fundu Infraestrutura (FI) ezekuta ona millaun $9,6 hosi orsamentu alokadu millaun $202,7, Fundu Dezenvolvimentu Kapitál Umanu (FDCH, sigla portugés) ezekuta ona millaun $3,8 hosi orsamentu alokadu millaun $17,8, enkuantu Fundu COVID-19 ezekuta ona millaun $1,97 hosi orsamentu alokadu millaun $18.
To’o iha inísiu semestre dahuluk 2023, Ministériu Finansa halo ona levantamentu osan hosi Fundu Mina-rai ho montante millaun $490 hosi totál orsamentu biliaun $1,3 ne’ebé mak Parlamentu Nasionál aprova ona liuhosi Lei OJE 2023.
Jornalista : Antónia Gusmão
Editora : Julia Chatarina
