DILI, 02 juñu 2023 (TATOLI)–Ezekusaun reál Orsamentu Jerál Estadu (OJE) 2023 ba Todo Governo esklui kompromisu no obrigasaun sira to’o iha loron 31 fulan-maiu, ein termu nominál atinje ona millaun $438,2 hosi orsamentu aprovadu biliaun $2,16.
“Ezekusaun reál OJE 2023 iha fulan daruak, trimestre daruak ba Administrasaun Sentrál ein termu nominál atinje ona millaun $425,8 hosi totál orsamentu alokadu biliaun $1,8. Enkuantu Autoridade Rejiaun Administrativa Espesiál Oé-cusse Ambeno no ZEESM ezekuta ona millaun $12 hosi orsamentu alokadu millaun $120,” refere nota ne’ebé Agência Tatoli asesu, sesta ne’e.
Notísia relevante : Governu ezekuta ona millaun $282,9 hosi OJE 2023
Enkuantu, ezekusaun OJE 2023 iha Administrasaun Sentrál ne’ebé a’as liu mak iha liña ministeriál ezekuta ona millaun $320,7 hosi orsamentu alokadu biliaun $1,2. Tuir kedan ho Ajénsia Autónoma sira ho nia ezekusaun atinje ona millaun $59,8 hosi orsamentu alokadu millaun $218,3.
Autoridade munisipál ezekuta ona millaun $33 hosi orsamentu alokadu millaun $81,3. Fundu Infraestrutura (FI) ezekuta ona millaun $6,3 hosi orsamentu alokadu millaun $202,7.
Fundu Dezenvolvimentu Kapitál Umanu (FDCH, sigla portugés) ezekuta ona millaun $3,6 hosi orsamentu alokadu millaun $17,8 no Fundu COVID-19 ezekuta ona millaun $1,7 hosi orsamentu alokadu millaun $18.
To’o inísiu segundu trimestre 2023, Ministériu Finansa halo ona levantamentu osan husi Fundu Mina-rai ho montante millaun $490 hosi totál orsamentu biliaun $1,3 ne’ebé mak Parlamentu Nasionál aprova ona liuhosi Lei OJE 2023.
Jornalista : Antónia Gusmão
Editora : Julia Chatarina
