DILI, 28 abríl 2023 (TATOLI)–Ezekusaun reál Orsamentu Jerál Estadu (OJE) 2023 ba Todo Governu, esklui kompromisu no obrigasaun sira to’o loron 27 abríl atinje ona millaun $282,9 hosi orsamentu aprovadu biliaun $2,16.
“Ezekusaun reál OJE 2023 iha fulan dahuluk, trimestre daruak ba Administrasaun Sentrál ein termu nominál atinje ona millaun $275,9 hosi totál orsamentu alokadu biliaun $1,8,” refere nota ne’ebé Agência asesu, sesta ne’e.
Autoridade Rejiaun Administrativa Espesiál Oé-cusse Ambeno (RAEOA) ezekuta ona millaun $5,1 hosi orsamentu alokadu millaun $84.
Fundu espesiál dezenvolvimentu RAEOA ezekuta ona millaun $1,8 hosi totál orsamentu alokadu millaun $36. Nune’e, ezekusaun OJE 2023 iha Administrasaun Sentrál a’as liu mak iha liña ministeriál, ne’ebé ezekuta ona millaun $193,5 hosi orsamentu alokadu biliaun $1,2.
Notísia relevante : Ezekusaun reál OJE 2023 atinje ona millaun $53,4
Nota ne’e haktuir tan, Ajénsia Autónoma ho nia ezekusaun atinje ona millaun $44,6 hosi orsamentu alokadu millaun $218,3, Autoridade Munisipál ezekuta ona millaun $29 hosi orsamentu alokadu millaun $81,3, Fundu Infraestrutura (FI) ezekuta ona millaun $5,2 hosi orsamentu alokadu millaun $202,7. Enkuantu Fundu Dezenvolvimentu Kapitál Umanu (FDCH, sigla portugés) ezekuta ona millaun $2,6 hosi orsamentu alokadu millaun $17,8, no Fundu COVID-19 ezekuta ona besik millaun $1.
“Iha trimestre dahuluk 2023, Ministériu Finansa halo ona levantamentu osan hosi Fundu Minarai ho montante millaun $300 ka 22% hosi totál orsamentu biliaun $1,3, ne’ebé mak Parlamentu Nasionál aprova ona liuhosi Lei OJE 2023,” nota adianta.
Tinan kotuk, ezekusaun reál OJE 2022 ein termu nominál atinje biliaun $1,743. Valór nominál ida-ne’e mak a’as liu iha istória Timor-Leste no konsege ultrapasa ezekusaun reál OJE 2016 ne’ebé Governu konsege ezekuta biliaun $1,630.
Ho ezekusaun reál OJE 2022 ne’ebé fenomenál sa’e 7% kompara ho ezekusaun reál OJE 2016, hatudu katak kapasidade ezekusaun orsamentál iha liña ministeriál mós aumenta.
“Atu mantein ritmu no kapasidade ezekusaun ida-ne’e, presiza investimentu kontínuu iha área rekursus umanu no iha sistema sira inklui iha enkuadramentu legál sira,” refere nota hosi Ministériu Finansa.
Jornalista : Antónia Gusmão
Editora : Julia Chatarina
