VIQUEQUE, 17 juñu 2023 (TATOLI)—Administradór postu Uatolari, munisípiu Viqueque, Manuel do Rosário, agradese ba VIII Governu liuhosi Ministériu Administrasaun Estat (MAE) ne’ebé kontinua oferese tan Uma Naroman ba Povu (UNP) adisionál hamutuk unidade 37.
“Ho ida-ne’e ha’u hato’o parabéns ba Ministru tanba konsidera Uatolari espesiál,” Administradór hateten ba Agência Tatoli, iha postu Uatolari, sábadu ne’e.
Notísia relevante : PNDS distribui zinku UNP + B ba uma-kain 37 iha Uaitame
UNP unidade 37 ne’ebé foin lalais oferese ba Uatolari, sei distribui ba suku neen ne’ebé sei harii iha tinan ida-ne’e.
“Ha’u la hatene postu haat iha Viqueque ne’e hetan ka lae. Tanba iha momentu ne’ebá ha’u rasik mensajen direta ba Ministru, maibé nia tau konsiderasaun ba ha’u-nia mensajen hodi oferese uma ba Uatolari. Tanba ne’e, ha’u husu ba Xefe suku sira, ita tenke implementa lalais tanba ida-ne’e ita bolu adisionál. Hosi mandatu Governu ne’e hotu sai maka restu iha fahe hotu ba ninia povu sira, Governu foun mai maka kontinua fahe tan,” nia hato’o.
Antes ne’e, iha postu Uatolari iha tinan 2022 harii UNP regular hamutuk unidade 66, UNP plus A unidade 50 ne’ebé daudaun ne’e sei faze konstrusaun.
Daudaun ne’e postu Uatolari kontinua hetan UNP hamutuk unidade 37, nune’e VIII Governu oferese ona uma 153 ba postu Uatolari.
Jornalista : Vitorino Lopes da Costa
Editora : Julia Chatarina
