ERMERA, 12 Juñu 2026 (TATOLI)—Arsebispu Metropolitana Arkidioseze Dili, Dom Virgílio Kardeál do Carmo da Silva, akompaña husi Xefe Kaza Sivil Prezidénsia Repúblika, Henriqueta Maria da Silva hamutuk ho Autoridade Munisípiu Ermera, Sesta ne’e, inaugura Kapela Sagradu Korasaun de Jesus iha Suku Eraulu, Postu Administrativu Letefoho, Munisípiu Ermera.
Konstrusaun ba kapela ne’e hahú hatuur fatuk dahuluk iha tinan 2010 no finaliza iha Juñu 2026, ne’ebé hetan bensaun direta husi Arsebispu Mertropolitana Arkidioseze Dili, Dom Virgílio Kardeál do Carmo da Silva.
Konstrusaun ba obra ne’e ho kustu $200.000-resin, hetan apoiu husi Vatikanu, komunidade husi Eraulu rasik, Vatikanu Misio, Letefoho-oan ne’ebé hela iha Austrália ka Letefoho East Timor Suport (LETS) nomós Señor Jack ho nia espoza Mónika iha Austrália liuhusi Egidio Maia husi Sentru Kongregasaun Santa Baquita ne’ebé iha Eraulu Letefoho.
Amu Pároku Letefoho, Hélio Pereira Fernandes, hateten, konstrusaun kapela ne’e la’o durante tinan 16 nia laran.
“Kapela ne’e nia konstrusaun atrazu oituan tanba materiál sira ne’e hola husi Indonézia no nia simu ne’e husi Béljika, hatama liuhusi Austrália, foin mak importa mai Timor-Leste. Materiál sira ne’ebé ita uza iha konstrusaun ida-ne’e mak fatuk, rai henek, simente, maibé restu husi materiál ne’e husi Indonézia (Surabaya) no husi Austrália,” Amu Pároku informa ba jornalista sira hafoin inaugurasaun kapela iha Suku Eraulu.
Kapela ne’e dezeña no responsável husi Jack ho nia espoza Mónica no komunidade Eraulu kontribui hodi serbisu no parte Pároku Letefoho selu badaen sira.
“Ho kapela foun ida-ne’e, komunidade Eraulu sente orgullu, kontente no iha esperansa boot ba futuru, katak fatin ida-ne’e sai sentru Sagradu Korasaun de Jesus ba apostuladu sira iha nível vigária nomós ami hanoin aban bainrua bele foti sai nível nasionál mas ne’e depende ba Amu Bispu nia desizaun no konsellamentu,” nia akresenta.
Notísia relevante : Sarani solisita Governu apoiu fundu reabilita Kapela Avé Maria Fleixa
Padre Hélio konsidera, kapela ne’e sai hanesan Maromak nia horik fatin nune’e sarani sira bele mai reza hodi hametin fiar, haburas fiar no bele haklaken sira-nia fiar.
Iha fatin hanesan, Prezidente Komisaun Organizadora ba kapela Sagradu Korasaun de Jesus, Egidio Maia, hateten, Komunidade lokál rasik mak inisia konstrusaun ne’e.
Nia haktuir, kapela ne’e iha ona desde tinan 1975, harii ho uma duut, halo mudansa ba au iha tinan 1986, ikus mai inaugura husi Bispu Dom Carlos Filipe Ximenes Belo iha altura ne’ebá.
Hafoin Referendu iha tinan 1999, iha grupu doadór husi Austrália mai Dili no momentu ne’ebá Dioseze Dili haruka hasoru Padre Domingos Maubere, nune’e Amu haruka delegasaun bá Eraulu.
Bainhira sira mai iha Eraulu, hafoin halo komunikasaun intensiva, komunidade lokál prontu ajuda atividade umanitária.
“Ami halo enkontru ho sira, ami husu karik halo atividade iha ne’e husu buat rua, halo klínika ida mai ami no kapela ida. Rezultadu mak klínika harii duni no ikus sira harii kapela ida agora ita hambriik ne’e,” Egidio konta tuir.
Kuidadu nu’udar fatin sagradu
Nune’e mós, Arsebispu Mertropolitana Arkediosese Dili, Dom Virgílio Kardeál do Carmo da Silva, iha nia omília, husu ba Sarani Eraulu atu kuidadu Kapela Sagrada Korasaun de Jesus nu’udar fatin sagradu.
“La’ós tanba kapela mak importante liu, sim ita presiza kapela, maibé ohin buat ne’ebé importante liu mak ita selebra festa Sagrada Korasaun de Jesus. Entaun momentu furak ida mak ita hamutuk iha ne’e no tempu hanesan ita haksolok tanba ohin ita simu Prezente boot husi Na’i Maromak mak kapela Sagrada Korasaun de Jesus Eraulu. Entaun halulik uma orasaun ida-ne’e ho di’ak tuir festa Sagrada Korasaun de Jesus ne’e ohin ita selebra,” nia katak.
Dom Virgílio mós agradese ba hirak ne’ebé apoiu kapela ne’e ho sakrifísiu tanba ema balun mobiliza rekursu.
Dom Virgilio apresia ho komunidade Eraulu tanba iha ona kapela ne’ebé ho kondisaun di’ak tebes, kompara ho tinan-lima liubá.
Hafoin misa, Dom Virgílio Kardeál do Carmo da Silva halo kedan bensaun ba Kapela Sagrada Korasaun de Jesus.
Jornalista : Natalino Costa
Editora : Julia Chatarina
