AINARU, 07 Marsu 2026 (TATOLI)–Sarani sira iha Kapela Avé Maria Fleixa solisita Governu liuhusi Primeiru-Ministru, Kay Rala Xanana Gusmão atu apoiu fundu kontinuasaun ba reabilitasaun kapela ne’e, tanba durante tinan rua ona paradu.
Katekista Kapela Avé Maria Fleixa, Armindo Pereira, hateten kapela ida-ne’e hahú konstrui iha tinan 1990 no ramata iha tinan 1992, maibé kondisaun kapela aat tiha entaun iha tinan 2023 reabilita fali.
“Uluk ne’e sarani ladún barak entaun sufisiente hodi akumula sarani sira durante misa, maibé agora sarani kontinua aumenta entaun ita tenke reabilita no loke espasu ba sira tanba se lae bainhira misa ruma labele akumula sarani sira ho di’ak,” nia haktuir iha Fleixa, Aitutu, Sábadu ne’e.
Reprezentante sarani, António dos Reis, sente kontente ho apoiu husi Primeiru-Ministru, hanesan oferese kalén 100 no estátua ba kapela ne’e, maibé sira sei nafatin husu ba Governu tanba sei falta fasilidades barak hanesan meza, kadeira no fundu ba reabilitasaun nian.
Governu nia resposta
Hatán ba preokupasaun ne’e, Primeiru-Ministru Kay Rala Xanana Gusmão, rekoñese katak Governu seidauk fó-atensaun ba kapela ne’e.
“Ohin ha’u haree ona kondisaun kapela nian. Ita ukun an besik tinan 24 ona maibé ami ne’ebé ukun Governu seidauk kumpri ami-nia obrigasaun atu hadi’a imi-nia moris,” nia tenik.
Xefe Governu promete sei haruka fasilidade mai iha kapela ne’e no sei orienta Ministériu Obra Públika atu halo levantamentu dadus hodi kontinua reabilita kapela referida.
“Saida mak imi husu ba Governu loron ida sei haruka to’o mai imi tanba rekomendasaun ne’e benefísia ba povu hotu no loron ida ita bele mai fali inaugura kapela ne’e,” nia hateten.
Jornalista: Alexandra da Costa
Editór: Xisto Freitas da Piedade
