DILI, 08 agostu 2023 (TATOLI) – Universidade Dili (UNDIL) simu rekomendasaun husi avaliadór nasionál no internasionál sira atu hadi’ak kursu jestaun iha Fakuldade Ekonomia, tanba kursu ne’e seidauk garante kualidade estudante sira iha futuru.
Vise-Reitór Asuntu Akadémiku UNDIL, Francisco Martins Mausoru, konsidera rekomendasaun sira ne’ebé hato’o ne’e universidade sei hadi’a hodi garante kualidade.
“Kursu jestaun ne’e hetan atensaun maka’as husi ekipa painél sira, tanba sira hakarak ita atu hadi’a nia kualidade atubele garante dezenvolvimentu kursu ne’e rasik iha futuru. Ita simu no sei haka’as an atu halo tuir”, Francisco Martins dehan iha kampus UNDIL, iha Mascarinhas.
Rekomendasaun ne’ebé kursu jestaun ne’e tenke kompleta maka tenke aumenta livru, rekursu umanu maski iha ona dosente mestradu no doutoramentu, hadi’a sistema atendimentu ba estudante sira, presiza reforsa tan programa peskiza sientífika.
“Iha UNDIL kuaze departamentu sira inklui jestaun rasik koloka ona dosente na’in-lima permanente ho sira nia grau akadémiku doutoramentu no mestradu, maibé rekomendasaun panelista sira nia husu atu aumenta tan. Ida ne’e maka ita sei kompleta. Tanba ita rasik mós tama iha ekipa avaliasaun akadémika ne’ebé maka ANAAA realiza daudaun ne’e”, nia salienta.
Kona-ba atividade peskiza, Francisco Martins rekoñese katak departamentu ne’e halo ona, maibé seidauk afetivu tanba ne’e ho rekomendasaun sira hanesan ne’e UNDIL sei halo esforsu atu aselera prosesu peskiza sira no bainhira estudante sira hakerek monografia karik sira bele foti referénsia husi rezultadu peskiza sira.
“Ida ne’e maka ekipa avaliadór akadémiku sira husu ba UNDIL atu halo hodi bele garante kualidade iha futuru. Avaliasaun ida ne’e nu’udar meiu ida atu kada universidade no kada kursu sira tenke rekoñese ida-idak nia-an atu buka hadi’a buat ne’ebé seidauk di’ak no buka halo di’ak liután sira ne’ebé di’ak ona”, afirma.
UNDIL iha kursu rua maka tama iha avaliasaun akadémikA Ajénsia Nasionál Avaliasaun no Akreditasaun Akadémika (ANAAA) nian ba tinan 2023 maka kursu jestaun no kontabilidade. Kursu rua ne’e hetan ona akreditasaun no agora tama fali ba reavaliasaun atu haree fila nia progresu sira.
Rekorde katak ANAAA lansa iha, marsu ne’e, avaliasaun inisiál ba Institutu Boaventura Timor-Leste no kursu 30-resin ba universidade públika no privada. Hafoin lansamentu, programa akreditasaun ne’e foin realiza entre jullu to’o outubru 2023, ba UNPAZ, UNDIL, UNITAL, IOB, DIT, ICSP Baucau, ISC, ETCI no IPB.
Jornalista: Tomé Amado
Editora: Maria Auxiliadora
