DILI, 11 outubru 2023 (TATOLI)–Ekipa Kámara Munisipál Lisboa (KML) ho Autoridade Munisipal Dili (AMD) aprezenta dezeñu estudu prelimináriu (préviu) rekualifikasaun espasu públiku Jardin de Largo Lecidere ba membru Governu no diretór sira.
PrezidenteAutoridade Munisípiu Dili (AMD), Guilhermina Filomena Saldanha Ribeiro, hateten aprezentasaun dezeñu ba projetu pilotu espasu públiku ba Jardin Largo de Lecidere ho objetivu atu bele hatene no simu sujestaun hosi parte Governo no diretur sira kona-ba dezeñu.
“Presiza mos fó hanoin ba tékniku sira kona-ba estudu préviu ba dezeñu nebe sira halo kona-ba projetu espasu públiku,” Prezidente Autoridade Munisípiu Dili (AMD) ne’e hateten ba jornalista sira iha Caicoli, kuarta ne’e.
Sekretariu de Estadu Asuntu Toponimia no Organizasaun Urbana, Germano Santa Brites Dias, konsidera projetu pilotu ne’e importante no fó hanoin ba tékniku sira atu hadi’a di’ak liután hodi nune’e bele aprezenta ba Governu iha Konsellu Ministru.
Nia sujere ba tékniku UCCLA nian atu aumenta dezeñu kona-ba iluminasaun, kâmara video vijlânsia no seluk tan ba iha dezeñu espasu públiku Lecidere.
“Ha’u hein atu rona kona-ba rezultadu sira hosi estudu preliminár kona-ba rekualifikasaun ba fatin públiku ne’ebé lokaliza iha Bidau Lecidere. Atividade ne’e hanesan projetu pilotu ida-ne’ebé iha objetivu atu hadi’a protesaun, seguransa no mobilidade sidadaun sira-nian,” nia dehan.
Projetu pilotu ba espasu públiku hanesan komponente ida hosi apoiu Uniaun Europeia nian ba implementasaun Programa Parseria ba Sidade Sustentavel ne’ebé implementa hosi UCCLA hamutuk ho Câmara Municipal de Lisboa no Autoridade Munisipiu Dili.
Embaixador Marc Friedrich sente orgulu tanba enjeñeiru AMD ho Kâmara Municipal Lisboa fo sira-nia kontribuisaun ba dezeñu projetu pilotu espasu públiku urbanu ne’e.
“Ida-ne’e mak hanesan asaun ida-ne’ebé ita espera atu alkansa liuhosi programa Parseria ba Sidade Sustentavel iha Azia no Pasifiku, ne’ebé bele halibur ema sira-ne’ebé iha servisu hanesan, hasoru dezafiu sira hanesan no tenke hatán ba nesesidade no pedidu sira-ne’ebé hanesan, husi sidadaun sira. Programa hirak-ne’e kontribui ba transferénsia koñesimentu no dezenvolvimentu abilidade no oferese oportunidade atu hetan ideia no inspirasaun foun hosi ema seluk, ne’ebé halo servisu hanesan,” nia dehan.
Embaixadór ne’e fiar katak liu hosi parseria hirak-ne’e sei lori duni benefísiu no meritu, iha kazu espesífiku entre UCCLA, AMD no Câmara Municipal de Lisboa
Marc Friedrich hateten, programa ida-ne’e la’o dezde 2022 ne’ebé hahú ona atividade oioin ho susesu, hanesan kriasaun sentru formasaun multi-funsionál, dezenvolvimentu materiál didátiku no fornesimentu kursu lian portugés.
Diplomata ne’e husu ba implementadór projetu atu uza didi’ak tempu limitadu ne’ebé sei disponivel iha projetu ne’e, no halo esforsu tomak hodi aselera prosesu implementasaun.
Jornalista : Jesuína Xavier
Editór : Cancio Ximenes
