DÍLI, 13 Maiu 2026 (TATOLI) – OXFAM Timor-Leste, hamutuk ho Asosiasaun Jornalista Timor-Leste (AJTL), fasilita formasaun kona-ba Lei ba Rai no Direitu ba Rai ba jornalista na’in-17, atu hasa’e sira nia koñesimentu kona-ba termu jurídiku iha área referida.
Partisipante sira mai hosi meiu komunikasaun oioin, inklui Jornal Independente, Lolowari, TVE, Lafaek News, Hatutan News, Neon Metin, DFM, TATOLI, no mos jornalista balun husi munisípiu.
Formasaun ho tema “Land Rights and Women’s Land Rights Training” ne’ebe fasilita hosi advogadu privadu Tito Maria dos Reis, hala’o husi loron 13 to’o 15 Maiu, iha aula edifísiu OXFAM, Hudilaran, Dili.
Iha abertura formasaun, Diretór OXFAM Timor-Leste, Jude Perepa, hateten katak objetivu hosi formasaun ida-ne’e mak atu ajuda jornalista sira hasa’e sira nia kapasidade iha utilizasaun terminolojia no vokabuláriu jurídiku ne’ebé loos bainhira hakerek notísia, atu nune’e labele hamosu konflitu iha sosiedade.
“Husu ba hotu-hotu atu aproveita formasaun ida-ne’e hodi hakroat imi nia kapasidade no haforsa imi nia instituisaun ne’ebé imi servisu bá,” hateten Jude Perepa.
Jornalista: Camílio de Sousa
Editór: Filomeno Martins
