DILI, 31 outubru 2023 (TATOLI)–Na’in ba loja retallu, Mei Mart, Jackson Lay, husu ba povu agrikultór sira atu kuda modo barak no produtu lokál sira seluk tanba Timor-Leste iha rai bokur barak.
“Produtu lokál sira ne’ebé fa’an iha ami-nia loja, ita-nia maluk sira mak lori mai, produtu hirak ne’e ho folin la karun liu, modo sira ne’ebé maluk agrikultór sira hatama mai ami-nia loja ne’e hotu lalais de’it,” Jackson Lay, hateten iha ninia knaar fatin, Mei Mart, Fatuhada, tersa ne’e.
Produtu lokál sira ne’ebé durante ne’e fa’an iha loja retallu ne’e ho folin baratu no iha modo barak maibé iha parte seluk negosiante ki’ik sira mós fa’an iha estrada ninin no ema sosa ho folin baratu.
“Ami-nia loja durante ne’e simu mós produtu seluk hanesan manu-tolun lokál no masin ne’ebé prodús iha Timor, maibé kuantidade manu-tolun ne’e menus tebes, enkuantu masin ema ladún sosa,” nia akresenta.
Notísia relevante : Garante merkadoria, CLN enkoraja agrikultór Uatulari hasa’e produsaun lokál
Jestór Supermerkadu ne’e subliña, durante ne’e sempre fó hanoin beibeik ba populasaun agrikultór sira atu serbisu maka’as hodi prodús modo no ai-fuan sira seluk.
“Ha’u sempre ko’alia ho komunidade ne’ebe lori sasán mai hatama iha ami-nia loja katak tenke aumenta produtu lokál, katak produs halo barak tan. Ha’u nu’udar timor-oan, ha’u mós lakohi sasan kiik-boot importa de’it. Tanba ita hela iha rai bokur nia leten, ita tenke haka’as-an hodi serbisu maka’as hodi aumenta produtu lokal,” nia tenik.
Produtu lokál ne’ebé faan iha Mei Mart hanesan manu-tolun lokál, modo tahan, alfase, tomati, no bee hemu ho marka freska.
Jornalista : Antónia Gusmão
Editora : Julia Chatarina
