VIQUEQUE, 20 novembru 2023 (TATOLI)—Polísia Nasionál Timor Leste (PNTL) munisípiu Viqueque rejista krime rua durante eleisaun órgaun suku segunda volta iha loron 13 outubru 2023.
“Hafoin votasaun mosu konflitu ida no sunu uma ida, nune’e ami rejista kazu krime rua no aprezenta ona ba Ministériu Públiku hodi prosesa,” Komandante PNTL munisípiu Viqueque, Superentendente João da Costa, informa ba jornalista sira iha munisípiu Viqueuqe, segunda ne’e.
Notísia relevante : PNTL la deteta autór sunu Xefe suku eleitu nia uma iha Bahalara-Uain
Eskudra Uatucarbau Rejista krime ida ne’ebé akontese iha suku Uani-Uma, iha tuku 16:45 lorokraik, entre eleitór sira. Hafoin votasaun hotu eleitór apoiante hosi kandidatura xefe suku na’in-rua maka hamosu diskusaun, la simu malu hodi baku no tuda malu.
“Nune’e iha momentu ne’ebá kedas ha’u rienta Polísia Unidade Intervensaun iha postu Uatulari hamutuk Eskudra Uatucarbau hodi halo kedas intervensaun iha suku Uani-Uma hodi kaptura suspeitu na’in-tolu. Maibé, ha’u observa situasaun la’o di’ak,” nianakresenta.
Aleinde ne’e, rejista krime ida iha suku Bahalara-Uain, postu administrativu Viqueque Vila, ne’ebé ahi han Xefe suku eleitu, Ângelo Laranjinha Pinto, nia uma.
“Akontesimentu sunu uma iha Bahalara-Uain la identifika suspeitu maibé aprezenta ona ba Ministériu Públiku. Nune’e mós, konfrontu iha suku Uani-Uma, postu Uatucarbau, maski vítima no suspeitu sira rezolve ona tuir família no kultura suku, maibé ninia prosesu krime ne’e ami kontinua aprezenta ba Ministériu Públiku, lei maka hanesan ne’e,” nia tenik.
Jornalista : Vitorino Lopes da Costa
Editora : Julia Chatarina
