VIQUEQUE, 17 novembru 2023 (TATOLI)—Polísia Nasionál Timor-Leste (PNTL) munisípiu Viqueque liuhosi Unidade Investigasaun Kriminál munisípiu Viqueque, la deteta autór sunu Xefe suku eleitu, Ângelo Laranjinha Pinto, nia uma iha aldeia Uelako, suku Bahalara-Uain, postu administrativu Viqueque Vila, munisípiu Viqueque.
“Akontesimentu inséndiu durante eleisaun segunda volta iha suku Bahalara-Uain, Xefe suku eleitu Ângelo nia uma hetan sunu. Hafoin akontesimentu Polísia hamutuk ho Autoridade bá haree ahi han uma ne’ebé la konsege salva. Nune’e, Unidade Investigasaun Kriminál ba rekolla informasaun maibé la deteta autór loloos ba akontesimentu ne’e,” Komandante PNTL munisípiu Viqueque, Superentendente João da Costa, informa iha suku Babulu, sesta ne’e.
Maski la deteta autór, maibé Unidade Investigasaun Kriminál rekolla ona informasaun no deklarasaun sira hosi vítima inklui viziñu sira, hanesan sasin.
“Ami aprezenta ona ba Ministériu Públiku, hafoin maka bolu tan sira ne’ebé sai sasin hodi bá hatan iha Ministériu Públiku,” nia hato’o.
Notísia relevante : APC Viqueque apoia pakote emerjénsia ba vítima inséndiu iha Bahalara-Uain Viqueque
Nia dehan, PNTL sei kontinua buka tuir autór sira, nune’e husu abitante sira tenke koopera ho autoridade seguransa, karik hetan informasaun tenke partilla ba malu.
“Ita tenke kombate ema-nia atitude gosta sunu uma. Se ita haree ho matan, maibé lakohi pasa informasaun ba PNTL, entaun susar atu deteta autór,” nia tenik.
Antes ne’e, iha segunda (13/11) bainhira eleitór sira iha suku Bahalara-Uain bá ezerse votu iha eleisaun órgaun suku tinan 2023 segunda volta, ahi han Ângelo Laranjinha Pinto nia uma to’o sasán iha uma-laran la konsege salva.
Iha momentu ne’ebá ekipa investigasaun rekolla kedan dadus hodi hatene motivu akontesimentu.
Jornalista : Vitorino Lopes da Costa
Editora : Julia Chatarina
