VIQUEQUE, 30 novembru 2023 (TATOLI)—Administrasaun munisípiu Viqueque hamutuk ho Servisu Agrikultura, ho koordenasaun hosi Diresaun Nasionál Alimentár hosi Ministériu Agrikultura, Pekuária, Peska no Floresta (MAPPF), kinta ne’e, realiza atividade espozisaun produtu lokál no kompetisaun kulinária nutritivu iha ámbitu komemora loron mundiál ai-han durante loron-ida.
Atividade ne’e realiza ho tema : ‘konservasaun bee no ai-han nutritivu ba ema hotu’, ne’ebé ho objetivu atu hafanu no motiva agrikultór sira hasa’e produsaun.
Hafoin ramata abertura atividade, Sekretáriu munisípiu Viqueque, Teotónio Sarmento da Silva, hateten, durante tinan barak povu Timor-Leste maioria dependénsia ba ai-han importasaun.
“Komemorasaun loron ai-han mundiál ida-ne’e, ha’u hanoin durante ne’e ita garantia ba produtu importasaun nune’e agora ita tenke muda mentalidade oinsá atu prodús ai-han rasik, liuliu to’os-na’in no natar-na’in sira, Servisu Agrikultura, inklui extensionista sira ne’ebé destaka iha suku bele fó motivasaun ba agrikultór sira prodús ai-han barak,” Teotónio Sarmento da Silva, dehan iha resintu Seguransa Sivil, postu Viqueque Vila, kinta ne’e.
Komorasaun loron mundiál ne’e, ba futuru sei realiza iha postu administrativu sira atu nune’e bele motiva agrikultór sira partisipa másimu.
“Kada tinan bainhira ita komemora iha munisípiu, dalaruma agrikultór sira la rona. Tanba ne’e, ha’u hanoin tinan oin ita bele komemora iha postu administrativu sira atu agrikultór sira-ne’ebé durante ne’e la partisipa bele partisipa hotu,” nia hato’o.
Notísia relevante : Viqueque sei selebra loron mundiál ai-han ho espozisaun produtu lokál
Eventu ne’e sei halo rotativa hodi agrikultór sira bele prepara ai-han nutritivu hodi hadi’a mós ema-nia nutrisaun.
“Ita liga ba produsaun ai-han iha munisípiu Viqueque kada tinan sempre menus, tanba ne’e presiza esforsu hodi hasa’e produsaun. Nune’e, ho komemorasaun mundiál ai-han, agrikultór sira bele aprezenta produtividade hanesan pateka, foos rai no produtu sira seluk ho di’ak, inklui mantein produsaun atu ita bele garante seguransa alimentár iha Viqueque,” Reprezentante administrasaun Viqueque tenik.
Iha fatin hanesan, Diretór Servisu Alimentár munisípiu Viqueque, Adelino Gusmão, enkoraja grupu agrikultór sira iha Viqueque atu mantein badinas hodi bele aprezenta produtu iha komemorasaun loron mundiál.
“Iha mundu ema ida la han loron ida sente labele, nune’e ita presiza hasa’e produsaun ai-han nutritivu. Realidade hatudu iha teritóriu Timor-Leste má-nutrisaun atinje 47% no munisípiu Viqueque rasik 48%. Liuhosi komemorasaun loron mundiál ne’e bele fó hanoin ba ita hotu hodi tau importánsia ba setór agrikultura,” nia tenik.
Nune’e mós, Komisaun Organizadora ba komemorasaun loron mundiál ba ai-han, António Soares, relata, komemorasaun loron ne’e iha Viqueque ho atividade hanesan espozisaun, kompetisaun tein no marsa saudável.
“Atividade kompetisaun kulinária envolve grupu lima ne’ebé reprezenta postu, ne’ebé grupu ida kompostu hosi Uatulari, Ossu Viqueque Vila no postu Lacluta, postu Uatucarbau maka la partisipa. Enkuantu, espozisaun ne’e grupu agrikultura maka partisipa hodi aprezenta sira-nia produtu lokál hanesan pateka, foos rai, fore-mungu, mina-nuu no produtu lokál sira seluk,” nia informa.
Atividade ne’e hetan apoia orsamentu hosi Diresaun Nasionál Alimentár ho montante $3.500, hosi organizasaun Catholic Relief Services (CRS) $150 no organizasaun sira seluk iha Viqueque.
Abertura atividade espozisaun no kompetisaun kulinária nutritivu partisipa hosi Komandante Polísia Nasionál Timor-Leste (PNTL) Viqueque, Superentendente João da Costa, Prezidente Kámara Komérsiu Indústria Timor-Leste (CCI-TL, sigla portugés) Viqueque, Diretór munisipál inklui grupu agrikultór sira.
Jornalista : Vitorino Lopes da Costa
Editora : Julia Chatarina
