VIKEKE, 01 Juñu 2026 (TATOLI)—Koordenadór Bee Timor Leste, Empreza Públika (BTL, E.P.) Munisípiu Vikeke, Marito da Costa, relata melloramentu sistema abastesimentu bee-moos iha Postu Uatukarbau, Munisípiu Vikeke, daudaun ne’e iha ona progresu signifikativu, tanba empreza kontinua instala kontadór bee-moos nian ba uma-kain sira.
“Empreza oras-ne’e kontinua instala kontadór ba uma-kain sira-ne’ebé atu asesu ba bee-moos,” Marito ba TATOLI iha Postu Vikeke Vila, Segunda ne’e.
Marito esplika katak empreza responsavel sira mós konklui ona konstrusaun tanke no instalasaun kanu bee-moos husi bee-matan bá parte vila nian no bá Suku Uaniuma no Suku Irabin de Baixo.
“Melloramentu sistema abastesimentu bee-moos ba Postu Uatukarabu prevee instala kontadór purvola 985, maibé daudaun ne’e ita-nia empreza responsavel foin instala kontadór hamutuk 100-resin,” nia esplika.
Aleinde ne’e, nia dehan, tanke rezervatóriu rua mak seidauk konstroe, maibé materiál empreza lori ona ba Uatukarbau, agora seidauk servisu tanba kondisaun udan.
Nia dehan melloramentu bee-moos iha Postu Uatukarbau utiliza rekursu bee-matan Uaibati lokaliza iha Suku Irrabin de Baixo ho débitu bee litru 45 pursegundu, instala kanu tranzmisaun ho distánsia kilómetru ualu (8) no instalasaun liña distribuisaun ho distánsia kilómetru 11.
Nune’e, obra referida sei fornese bee-moos ba populasaun totál hamutuk 5.910 husi uma-kain 985.
Rekorda fali katak obra sistema melloramentu iha postu Uatukarbau hahú implementa iha 2025, kustu projetu sistema bee-moos totál hamutuk $1.334.472,12, ne’ebé konstrui husi empreza Helfia Unip. Lda, durasaun servisu tinan ida.
Jornalista: Vitorino Lopes da Costa
Editór: Xisto Freitas da Piedade
