DILI, 13 dezembru 2023 (TATOLI) – Diretora Servisu Saúde Munisípiu Dili, Agostinha Segurado, informa Profisionál Saúde iha Munisípiu Dili hamutuk 225 mak sei konklui kontratu iha loron 31 fulan dezembru tinan ida-ne’e, maibé la kontinua mak sei sai dezafiu ba rekursu umanu ne’ebé fó atendimentu ba pasiente sira.
“Iha Dili Profisionál Saúde ne’ebé kontratadu ne’ebé destaka iha sentru saúde, postu saúde sira iha Dili mak hamutuk 225, hirak ne’e nia kontratu remata iha 31 dezembru maibé la kontinua afeta ba pasiente sira ne’ebé presiza tulun”, Agostinha Segurado hateten iha nia kna’ar fatin Formoza, ohin.
Nia dehan, Profisionál Saúde sira ne’e iha área oioin mak enfermeira, médiku, parteira no tékniku aliadu sira mak farmasista, analista, nutrisionista, saúde públika, radiolojista no seluk- seluk tan, ne’ebé sira kontratu bainhira hotu sei hamosu dezafiu ba iha rekursu umanus”, Segurado esplika.
Tanba ne’e, nia husu ba MS, se bele ba oin kontinua tan kontratu atu Profisionál Saúde sira fó nafatin atendimentu ba pasiente sira ne’ebé mak presiza tulun.
Iha fatin hanesan, Diretór Servisu Saúde Munisípiu Manatuto, Mateus Vicente Correia, informa Profisionál Saúde iha Manatuto hamutuk 180-resin mak kontratu sei remata iha 31 dezembru.
“Ami iha Manatutu ne’e profisionál saúde kontratadu husi MS hamutuk 180-resin ne’ebé ita koloka iha sentru saúde no postu saúde sira, maibé ida-ne’e mak kontratu hotu iha loron 31 dezembru, MS la kontinua kontratu ida-ne’e mak sei sai problema iha baze tanba ema atu atende pasiente sira la iha ona”, nia afirma.
Tanba ne’e Diretór Servisu Saúde Munisípiu Manatuto husu ba MS atu ba tinan oin nafatin halo kontratau ho pesoál saúde sira tanba sira mak atende pasiente direta, se hapara mak servisu saúde primaria sei sai problema boot.
“Ha’u husu ba na’in ulun sira katak karik bele, saúde tenke tau importánsia tanba ami direta atende ema, se hapara sira-nia kontratu entaun atu mellora saúde primaria automatikamente persentajen monu, tanba pesoál saúde sira la mantein ho sira-nia kontratu, tanba ne’e ha’u rekomenda ba Governu, se bele iha fulan janeiru bele extende tan sira kontratu atu sira bele mantein nafatin iha sentru saúde to’o iha postu saúde sira”, nia haktuir.
Iha sorin seluk, Ministra Saúde Elia dos Reis Amaral, hateten sei hapara profisionál saúde sira ne’ebé mak kontratu remata iha loron 31 fulan dezembru tinan ne’e.
“Ba pesoál saúde sira ne’ebé mak ninia kontratu sei remata iha loron 31 fulan dezembru tenke hapara, depois kontinua ba rekrutamentu entaun sira ne’ebé termina kontratu bele konkore ba vaga ne’ebé mak Ministériu Saúde loke atu nune’e bele fó atendimentu ba populasaun sira iha ita-nia rain”, Ministra Saúde Elia dos Reis Amaral afirma.
Nia dehan, MS sei loke fali rekrutamentu atu pesoál saúde sir abele kontratadu la extende bele konkore fila fali.
Jornalista : Felicidade Ximenes
Editór : Zezito Silva
