Nilton Gusmão: ANP aprova ona planu insiál ba esplorasaun petrolífera iha Baukau-Vikeke
DILI, 05 Juñu 2026 (TATOLI) – Diretór-Ezekutivu Esperansa Timor Oan (ETO) Unipesoal, Lda, Nilton Gusmão, fó-sai katak Autoridade Nasionál Petróleu aprova ona planu inisiál ba esplorasaun área rai-maran (Onshore) nian iha parte Baukau no Vikeke., semana kotuk hetan ona aprovasaun planu serbisu inisiál tinan-ne’e nian husi ANP.
Planu serbisu inisiál ne’e hetan ona aprovasaun iha semana kotuk husi Autoridade Nasionál Petróleu no sei hahú serbisu iha terrenu tempu badak.
“Planu inisiál ba tinan ida-ne’e, ita halo de’it peskiza jeolójiku, entaun ita laiha atividade todan liu. Ita-nia tékniku sira sei la’o ba zona sira ne’ebé ami iha lisensa ba, rekolla fatuk hodi bele koñese ita-nia rai. Hodi haree mina matan ruma iha ne’ebá karik, ita identifika nune’e bele halo mapeamentu, antes tinan oin ita aprezenta filafali no hakat ba serbisu tékniku liu,’ Nilton Gusmão, ko’alia iha Otél Timor, ohin.
Tuir nia, peskiza ka esportasaun jeolójiku ne’ebé sira halo tinan-ne’e, sira sei identifika no lori materiál ne’ebé sira hetan sei ba halo teste iha laboratóriu nune’e bele fó indikasaun ruma molok ba faze tuir mai.
Rekorda katak, iha loron 05 Marsu 2026, Autoridade Nasionál Petróleu (ANP) ne’ebé reprezenta Ministériu Petróleu no Rekursu Minerál (MPRM) selebra akordu ho empreza Esperansa Timor Oan Unipessoal Lda., (ETO E&P 1) kona-ba fahe Kontratu Partida Produsaun (KPP) ho naran KFP-TL-OT-22-21 ba Bloku B iha área rai-maran (Onshore) nian iha parte Baukau no Vikeke.
Akordu ne’e asina husi husi Prezidente Autoridade Nasionál Petróleu, Gualdino do Carmo da Silva, no Diretór-Ezekutivu ETO, Nilton Gusmão, ho sasin husi Ministru Petróleu no Rekursu Minerál, Francisco Monteiro, Prezidente Autoridade Munisípiu Baukau, Veneranda Lemos no seluk tan.
Notísia relevante: https://tatoli.tl/2026/03/05/governu-eto-selebra-kontratu-fahe-produsaun-ba-esplorasaun-petrolifera
Jornalista: Arminda Fonseca
Editór: Evaristo Soares Martins
