DILI, 23 abríl 2024 (TATOLI) – Sekretáriu Jerál Federasaun Voleiból Timor-Leste (FVTL) interinu, Candido da Silva Pinto, hatete, planu ona iha tinan ne’e sei realiza Liga Voleiból Timor-Leste (LVTL) iha outubru to’o dezembru durante fulan tolu.
“Ami planu ona Liga Voleiból ne’e ita sei hala’o iha outubru to’o dezembru, proposta ita haruka ona ba Ministériu Juventude, Desportu, Arte no Kultura (MJDAK) iha tempu besik iha akordu ruma ita bele realiza ona liga,” Candido hatete ba Agência TATOLI iha edifísiu MJDAK, ohin.
Nia dehan, klube ne’ebé iha direitu absoluta atu kompete iha liga hamutuk ualu ba primeira divizaun; feto ualu no mane ualu. Enkuantu, segunda divizaun sei la termina klube no sei fó oportunidade ba klube se de’it bele kompete iha pontu di’ak bele ultrapasa ba primeira divizaun no iha primeira divizaun hetan pontu menus sei tuun ba segunda divizaun.
Iha sorin seluk, Diretór Nasionál Desportu Federadu MJDAK, Oscar Dias Quintas, hatete, voleiból sei realiza liga iha outubru tinan ne’e.
“Los duni Voleiból sei realiza sira nia liga iha fulan-outubru, orsamentu fiksu ona, hein de’it sira atu realiza sira nia liga,” Diretór ne’e hatete.
Tuir dadus ne’ebé Agência TATOLI asesu husi MJDAK orsamentu tinan 2024 ne’ebé preve ba LVTL hamutuk rihun $70.000.
Jornalista: Hortencio Sanchez
Editór: Rafael Ximenes de A. Belo
