DILI, 08 Jullu 2026 (TATOLI)—Atakante husi selesaun nasionál Arjentina Lionel Messi lori Arjentina hakat ba kuartu final hafoin halakon Ejiptu iha jornada 16 Kopa Mundiál 2026 ho eskore 3-2, ne’ebé realiza iha Estádiu Atlanta, kuarta madrugada oras Timor-Leste.
Maske manán maibé Messi nia ekipa sofre uluk golu rua, antes sira halo remontada iha minutu 79, 83 no tempu adisionál 90+3 no husi husi golu tolu ne’e Messi prodús ida.
Arjentina koko atu kontrola jogu dezde inísiu, Messi nia jogu hetan atake maka’as husi defeza ekipa Ejiptu nian.
Tentativa oioin atu pasa bola ba Messi hetan intersepsaun husi Ejiptu. Entretantu, Mohamed Salah ho nia kolega sira ho pasiénsia fó presaun ba Arjentina.
Ho momentun uitoan, Ejiptu lori vantajen iha minutu 15. Yasser Ibrahim halo kruzamentu ho ulun husi Marwan Attia, manan duelo aéreu ho Lisandro Martinez lori Ejiptu lidera 1-0.
Arjentina iha kedas oportunidade atu halo empata iha minutu haat liu tiha, penalidade ida hetan hafoin Nicola Tagliafico hamonu husi Haissem Hassan. Lionel Messi hakat ba oin hodi foti penalidade, maibé nia suta ba liman-loos salva husi guarda-rede ejípsiu Mostafa Shobeir, Arjentina la konsege marka golu empata.
Hafoin deskansa hemu bee, Arjentina tau fali presaun ba Ejiptu. Oportunidade osan-mean seluk mosu, dala ida-ne’e liuhusi Alexis Mac Allister nia kabesa, maibé Shobeir halo salvasaun brillante ida tan hodi mantein ida-ne’e.
Iha minutu 31, Messi ameasa fali baliza Ejiptu nian. Dala ida-ne’e ho suta livre ida ho distánsia dook ne’ebé kuaze tama bainhira la kona baliza ejípsiu nian.
Lakleur, to’o ona Julian Alvarez nia turnu atu ameasa. Simu redusaun ida husi Tagliafico, Alvarez hasoru ida-ne’e ho suta ida iha baliza nia oin maibé Shobeir salva beibeik.
Iha tempu restu husi primeira parte, esforsu sira Arjentina nian hodi fó presaun ba Ejiptu la fó rezultadu. Albiceleste mantein iha kotuk 0-1 iha intervalu.
Tama ba segunda parte, Arjentina hetan fali kontrolu ba jogu. Maibé, Lionel Scaloni nia ema sira luta atu sobu defeza ejípsiu nian.
Ejiptu, depende ba kontra-atake sira, konsege hatama golu iha minutu 58. Mostafa Zico marka liuhosi baliza Arjentina nian, maibé árbitru la permite golu ne’e hafoin revizaun VAR nian, ne’ebé fó sai falta ida hasoru Lisandro Martinez.
Iha minutu 67, Ejiptu konsege halakon fali impase. Zico ikusmai duplika vantajen Arjentina nian, hodi konverte Haissem Hassan nia redusaun ba rede. Ida-ne’e mós mosu husi kontra-atake ida ne’ebé lidera hosi Mohamed Salah. Eskoru maka 2-0 ba Ejiptu, no la kleur hafoin deskansa bee nian.
Jogu hahú fali, ho Arjentina kontinua fó presaun ba Ejiptu. Substituisaun oioin halo ona atu hadi’a jogu, Arjentina konsege hamenus pontuasaun iha minutu 79. Cristian Romero hatama ho kabesa Messi nia kruzamentu hodi halo eskore 1-2.
Dezastre akontese ba Ejitu lakleur. Messi mai fali salva Arjentina iha minutu 83, hodi kapitaliza pasajen Montiel nian iha luta ida iha kaixa penalidade ejípsiu nian. Messi nia suta kona poste maibé rebota ba baliza ejípsiu nian hodi muda eskore 2-2.
Ejiptu iha tempu ne’ebá iha presaun nia okos. Entretantu, Arjentina buka ho laran-manas ba sira-nia golu datoluk. Iha kontra-atake ida, Enzo Fernandez kabesa liu Shobeir, hodi baku iha kruzamentu Lautaro Martinez nian muda eskore mak 3-2.
Golu ne’e hamosu protestu husi ekipa Ejiptu, ne’ebé reklama falta ida hasoru Mohamed Salah. Árbitru fó mós kartaun mean ba membru ekipa Ejiptu ida-ne’ebé tama iha kampu. Jogu ne’e kontinua no Arjentina nia vitória mantein to’o huu árbitu finál.
Arjentina avansa ba kuartu-finál Kopa Mundiál 2026 no Ejiptu eliminadu.
Arjentina:
Emiliano Martinez; Nahuel Molina (Gonzalo Montiel 73′), Cristian Romero (Nicolas Otamendi 90+5′), Lisandro Martinez; Nicolas Tagliafico (Nico Gonzalez 66′); Rodrigo De Paul (Lautaro Martinez 66′), Alexis Mac Allister, Leandro Paredes, Enzo Fernandez; Lionel Messi, Julian Alvarez (Facundo Medina 90+5′).
Ejiptu:
Mostafa Shobeir; Mohamed Hany, Yasser Ibrahim, Ramy Rabia, Karim Hafez; Emam Ashour (Hamdhy Fathy 45′), Marwan Attia, Mohanad Lasheen (Zizo 90+6′), Haissem Hassan (Trezeguet 73′); Mohamed Salah, Mostafa Zico (Omar Marmoush 80′).
Messi sai ‘Man of the Match’
Lionel Messi hatudu dezempeñu ne’ebé furak tebes bainhira nia lori Arjentina ba vitória 3-2 hasoru Ejiptu iha Jornada 16 Kopa Mundiál 2026, La Pulga marka golu ida no fó asisténsia iha jogu iha Estádiu Atlanta, kuarta madrugada oras Timor-Leste nian.
Jogu ne’e susar tebes ba Arjentina. Lionel Scaloni nia ekipa monu iha kotuk 0-2 hasoru Ejiptu. Golu sira husi Yasser Ibrahim no Mustafa Zico tau defeza kampeaun sira ba kotuk.
Maibé, Arjentina nia mentalidade ne’ebé maka’as mak xave. Arjentina lakohi atu rende. Cristian Romero hamenus sofrimentu iha minutu 79. Nia ezekusaun ne’ebé maka’as halo 1-2.
Tuir mai, Lionel Messi marka golu iha minutu 83 hodi empata eskoru 2-2. Kulminasaun hosi regresu Arjentina nian mosu iha minutu 90+2, bainhira Enzo Fernandez marka golu hodi taka vitória ida ho 3-2.
Lionel Messi maka sei sai kulpa bainhira Arjentina la konsege manán. Iha minutu 21, Lionel Messi kria oportunidade marka golu husi penalti. Penalti ne’ebé Messi hetan salva husi guarda-rede Mostafa Shobeir. Arjentina lakon 0-1 iha momentu ne’ebá.
Maibé, Messi no Arjentina luta fali iha segunda parte. Romero nia golu sei la sai posivel bainhira laiha asisténsia hosi Messi. Hafoin ne’e, La Pulga lansa suta ida ne’ebé maka’as ne’ebé halo skor 2-2.
Messi lori Arjentina ba retornu, vitória, no kualifikasaun ba kuartu-finál. La Pulga hala’o ho di’ak tebes iha jogu tomak, exetu ba nia penalti ne’ebé nia lakon. Messi kria oportunidade neen no iha suta haat.
Messi agora marka ona golu iha jogu lima ne’ebé nia joga iha Kopa Mundiál 2026. Nia iha golu ualu no asisténsia ida. Dezempeñu estraordináriu ida hosi jogadór ho tinan 39 ne’e.
Messi mellor markadór provizóriu Kopa Kundiál 2026
Ho golu ida tan hasoru Ejiptu, Messi agora iha golu ualu (8) no lidera lista markadór di’ak-liu sira Kopa Mundiál 2026 nian.
Segundu lugar mak avansadu fransés Kylian Mbappé ho golu hitu (7). Avansadu noruegés Erling Haaland iha númeru golu ne’ebé hanesan ne’ebé iha terseiru lugar.
Entretantu, avansadu inglés Harry Kane iha kuartu lugar ho golu neen. Kintu lugar okupa husi kolega fransés Mbappé nian, Ousmane Dembele, ne’ebé maka marka ona golu haat iha torneiu tomak.
Messi sai íkonu futeból ba Arjentina
Lionel Messi, íkonu futeból mundiál no orgullu Arjentina nian, dala ida tan iha atensaun bainhira nia lidera nia selesaun nasionál iha Kopa Mundiál 2026. Iha emosaun nia leet hosi torneiu boot liu iha mundu, estátua jigante ida hosi Lionel Messi hamriik ho majestuozu hanesan omenajen ida ba nia dedikasaun no realizasaun sira ho Ekipa Tango.
Monumentu ho aas metru 26 lokaliza iha Cutral Co, sidade ida iha rejiaun Patagónia, iha Arjentina. Estátua ida-ne’e rejista hanesan monumentu ida ne’ebé aas liu ne’ebé harii ona hodi fó onra ba jogadór futeból ida no simboliza orgullu hosi povu Arjentinu ba sira nia kapitaun kampeaun mundiál.
Dezeñu estátua nian hatudu Lionel Messi hakru’uk enkuantu kaer kamizola selesaun Arjentina nian, hodi imortaliza momentu emosionál hafoin lori nia nasaun ba vitória iha Tasa Mundiál 2022 iha Qatar. Pose ikónika ida-ne’e simboliza Messi nia luta, sakrifísiu, no susesu hodi realiza mehi ida ne’ebé maka povu Arjentinu hein durante dékada barak.
Estátua Lionel Messi nian iha Patagónia agora la’ós de’it hanesan destinu turístiku foun ida maibé mós hanesan lembransa ida hosi Messi nia legadu imensu iha istória futeból mundiál nian. Monumentu ne’e hein atu atrai adeptu sira hosi nasaun oioin, liuliu durante Kopa Mundiál 2026, bainhira Lionel Messi nia naran sei enfeita fali palku internasionál futeból nian.
Jornalista : Hortêncio Sanchez
Editór : Cancio Ximenes
