DILI, 29 maiu 2024 (TATOLI)–Xefe Unidade Oftamolojia Sentru Nasionál Matan iha Hospitál Nasionál Guido Valadares (HNGV), Vígilio da Costa Pinto, hateten husi fulan-janeiru to’o maiu 2024 ne’e, Sentru Nasionál Matan iha HNGV rejista pasiente matan 42.642. foun liu rihun 14 pasiente.
“Husi totál pasiente matan ne’e, iha pasiente foun iha 14.370 no pasiente tuan sira-ne’ebé mai kontrola matan ne’e hamutuk 20.155,” Xefe Unidade Oftamolojia Sentru Nasionál Matan ne’e hateten ba jornalista sira iha HNGB Bidau, kuarta ne’e.
Responsável ne’e dehan, pasiente sira-ne’e ho idade maioria 30 ba leten, tanba kauza husi idade rasik, entaun sira ba kontrola atu bele hetan óklu.
“Iha idade 40 ba leten iha problema matan ne’ebé iha difikuldade atu halo leitura. Ida-ne’e fator idade,” nia hateten.
Labarik 50 matan haree la moos
Aleinde ne’e, iha sentru nasionál matan mós rejista pasiente ho idade tinan-lima 5) hamutuk 50 ne’ebé ba konsulta hodi uza ókulu tanba labarik sira-ne’e hare letra la moos iha eskola, entaun nia inan-aman lori ba konsulta iha Sentru Nasionál Matan.
Nia hateten, ema ne’ebé problema ho katarata no ema hotu labele la’o loron manas no ba kaer servisu iha toos ka natar, maibé tenke uza xapeu no ókulu, tanba loron matan bele estraga ema nia lensa matan.
Nia mós hateten, iha dadeersan, pasiente sira ba halo tratamentu matan liu atus mak ba iha sentru matan hodi halo tratamentu no kontrola matan.
Husu konaba rekursu umanu, ekipamentus no ai-moruk sufisiente ba atendimentu ba pasiente sira ho problema matan ne’ebé ba kontrola, nia hatán, iha rekusu sufisiente maibé iha problema uituoan mak kona-ba sistema internet ba rejistu online.
Notísia Relevante: Rekursu umanu iha Sentru Matan Nasionál HNGV seidauk sufisiente
Jornalista : Jesuína Xavier
Editór : Cancio Ximenes
