DILI, 12 maiu 2023 (TATOLI) – Xefe Departamentu Sentru Nasionál Matan iha Hospitál Nasionál Guido Valadares (HNGV), Julia Rosalina Cesar Magno, rekoñese rekursu umanu iha Sentru Nasionál Matan seidauk sufisiente.
“Rekursu umanu ne’ebé mak daudaun ne’e iha, ami espesialista na’in lima, ida problema família ne’ebé mak la servisu ona no ida seluk sai hanesan Diretór Klíniku HNGV, entaun hela ami na’in tolu de’it, ida ne’e siedauk sufisiente hodi halo tratamentu ba moras matan sira iha ne’e”, Julia Rosalina Cesar Magno dehan iha edifísiu TATOLI, ohin.
Nia husu ba Govrnu atu bele investe ba médiku sira iha área espesialista matan atu bele kobre ba munisípiu no to’o iha sentru saúde sira.
“Ami presiza tebes rekursu umanu tanba ne’e ba oin bele hasa’e tan númeru espesialista matan atu nune’e bele halo tratamentu matan to’o iha área remota sira”, nia afirma.
Nia sujere ba Governu tenke mantein haruka médiku sira ba eskola iha área espesialidade matan nian hodi bele fila fali mai halo tratamentu saúde matan ba timoroan sira.
“Ha’u sujere ba Ministériu Saúde katak tenke fó bolsu estudu ba médiku sira liuliu ba área matan nian hodi kontinua ba eskola iha nasaun India, Fiji no Nepal hodi hasai espesialidade ba matan tanba ne’e ita labele hein parseiru sira mak apoiu ita, maibé ita rasik investe mesak ita-nia ema”, nia konklui.
Jornalista : Felicidade Ximenes
Editór : Zezito Silva
