Postu saúde Ilat-laun hasoru problema falta bee-moos
BOBONARU, 09 Novembru 2026 (TATOLI)-Postu saúde iha suku Ilat-laun, postu administrativu Bobonaru, dadaun ne’e enfrenta problema krize bee-moos ne’ebé kauza husi bailoro naruk.
Parteira Agostinha Pires admite katak problema falta bee-moos kuaze akontese tinan-tinan tanba bee la sufisiente, ne’ebé afeta tebes ba nesesidade sanitáriu no atendimentu kazu emerjénsia, liuiliu inan isin-rua partu.
“Bee la mai kle’ur ona. Ami bá kuru ho motór iha kraik ne’ebá, dadeer tenke bá kuru tiha mak foin halo servisu. Ne’e mós kuru uitoan de’it, ami sente susar loos atende pasiente sira partu. Família lori ropa bá fase iha uma, ami mós lori ekipamentu sira bá fase iha li’ur”, nia informa ba Tatoli, segunda-feira ne’e.
Abitante Ilat-laun, Costâncio Barros, preokupa ho problema bee ne’e difikulta tebes pesoál saúde sira atu halo atendimentu ho lalais.
“Bee laiha bee, enfermeira haruka labarik sira bá kuru masa ida $0,25. Ida-ne’e ami triste tebes tanba klínika ne’e atende populasaun husi suku tolu, más bee-moos laiha durante tinan barak, ema la tau matan”, nia lamenta.
Tanba ne’e, nia husu ba Governu atu buka solusaun ba problema referidu. “Bailoro ne’e mak susar. Se bele Governu buka meiu fura bee ba klinika ne’e, para bailoro mós bee iha nafatin”, nia hato’o.
Tuir observasaun jornalista Tatoli, maske enfrenta problema falta bee-moos, maibé pesoál saúde sira nafatin halo atendimentu ba pasiente sira tuir orariu ne’ebé iha.
Totál rekursu umanu iha postu saúde referidadu hamutuk ema na’in-haat, kompostu husi parteira tolu, enfermeira ida, no voluntariu na’in-rua.
Postu saúde ne’e halo atendimentu ba komunidade husi suku Ilat-laun, Soilesu no Atuaben.
Notísia relevante: IDN kanaliza bee-moos ba uma-kain 359 iha Ilat-laun Marobo
Jornalista: Sergio da Cruz
Editora: Maria Auxiliadora
