iklan

BOBONARO, EKONOMIA, HEADLINE, MUNISÍPIU

IDN kanaliza bee-moos ba uma-kain 359 iha Ilat-laun Marobo

IDN kanaliza bee-moos ba uma-kain 359 iha Ilat-laun Marobo

Diretór IDN, Komodoro Donaciano Costa Gomes "Pedro Klamar Fuik" akompaña hosi Sekretáriu Autoridade Munisípiu Bononaro, João Fátima do Carmo, inaugura Instalasaun sistema bee-moos iha suku Ilat-laun, postu administrativu Bobonaro, munisípiu Bononaro. Imajen mídia IDN.

BOBONARO, 27 juñu 2022 (TATOLI) – Institutu Defeza Nasionál Timor-Leste (IDN-TL) inaugura sistema instalasaun bee-moos hodi kanaliza ba komunidade hamutuk uma-kain 359 iha aldeia Tunu Eru no Ilat-laun, área Marobo, suku Ilat-Laun, postu administrativu Bobonaro, munisípiu Bobonaro ho totál populasaun 2.635.

Projetu sosiál ne’ebé IDN implementa ho objetivu atu lori futuru líder hosi polísia no militár sira-ne’ebé atuál ne’e tuir hela formasaun iha IDN hodi hakbesik aan liu ba povu iha área rurál.

Notísia relevante:Orsamentu IDN $1,032,149 pasa iha espesialidade

Diretór (IDN), Komodoro Donaciano Costa Gomes “Pedro Klamar Fuik, hateten bee-moos importante ba ema hotu, tanba objetivu husi uku-an maka, povu tenke moris di’ak no hakmatek.

Nune’e Estadu iha responsabilidade ida, atu halo dezenvolvimentu infraesturtura bázika hanesan estrada, bee-moos, eletrisidade, kria kampu serbisu nune’e povu bele sente ukun-an ne’e fó duni liberdade no moris di’ak ba povu.

“Ita hotu hatene tinan 20 resik ita ukun an, problema bee-moos seidauk rezolve, Estadu tenke halo buat hotu, Orgnizaun Internasional buka dalan hotu atu fó bee-moos ba ita-nia populasaun hodi hakman ita-nia oan sira,” refere nota imprensa ne’ebé Agência TATOLI, asesu segunda ne’e.

Enkuantu sistema instalasaun hosi projetu sosiál ne’e, utiliza mákina bomba bee unidade tolu, konstrui tanki halibur ho tanki distribuisaun ho medida 3x 2,  hodi transfere bee hosi tanki halibur bee-matan, ba tanki distribuisaun iha foho-leten ho distánsia metru 620.

Nune’e mós fornese torneira jerál unidade haat hakbesik komunidade sira hodi asesu, inklui halo instalasaun liña eletrisidade hosi postu finál liña jerál nian to’o terrenu kuaze kilómetru 1. 4, ho totál orsamentu rihun $9-resin hosi IDN.

Sekretáriu  Autoridade Munisipál Bobonaro, João Fátima  do Carmo, konsidera inisitiva ne’e di’ak tebes tanba bele hakmaan kumunidade sira-nia preokupasaun ne’ebé durante ne’e enfrenta.

“Ohin, inagura hodi hakmaan ona komunidade sira bele asesu no bele ajuda servisu munisipál água no saneamentu, bele kontinua hamutuk ho lideransa komunitáriu sira ho grupu ne’ebé mak estabelese ona iha suku Ilat Laun,” nia agradese ba IDN.

Xefe suku Ilat-Laun, juvinal Pires Amaral, agradese tanba dezde ukun-an mai to’o agora difisíl atu asesu ba bee-moos.

“Ba oin, ami sei estabelese grupu ida maneja (halo jestaun) fasilidade instalasaun nune’e sira bele tau matan ba kanalizasaun bee-moos ne’e, no fahe oráriu hodi distribui ba komunidade, nomoos ami sei halibur fundu hosi komunidade hodi halo manutensaun wainhira falla,” na hateten.

Enkuantu komunidade Clementino Freitas sente haksolok ho apoia kanalizasaun bee-moos hosi IDN, tanba antes ne’e komunidade ba kuru bee ho distánsia ne’ebé kuaze kilómetru 500.

Notisia Relevante:IDN kanaliza bee-moos ba uma-kain 150 iha Darelau

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!