DILI, 05 jullu 2024 (TATOLI)–Diretór Ezekutivu Forum Organizasaun Naun Governamentál Timor-Leste (FONGTIL), Valentim da Costa Pinto, sujere ba lideransa desportivu hodi halo kongresu ida hili lideransa Federasaun Foteból Timor-Leste (FFTL) hodi dezenvolve foteból iha Timor-Leste.
Notísia Relevante: Amante Futeból sujere FFTL-Governu presiza promove kompetisaun regulár
“Ita hakarak ne’e, iha duni ema-ne’ebé iha dedikasaun no iha tempu barak bele organiza ita-nia futeból bele la’o di’ak. Ita-nia prezidente grupu futeból sira tenke haree hodi organiza kongresu ida iha futuru, karik bele hare ema-ne’ebé di’ak hodi dezenvolve ita-nia futeból bele la’o di’ak,” Diretór Ezekutivu FONGTIL, Valentim da Costa Pinto, hateten ba jornalista sira iha semináriu ho tema “Reforsa kna’ar sosiedade sivil iha dezenvolvimentu nasionál” iha salaun CNE, Colmera, sesta ne’e.
Grupu foteból iha Timor, bele haree ona no tenke hili pesoál ruma ne’ebé iha nia integridade di’ak no iha duni kapasidade atu kontinua haree futeból Timor-Leste bele la’o ho di’ak.
Lideransa deportivu sira iha Timor-Leste, nia dehan, tenke hili ona líder ida ba iha FFTL hodi promove atividade foteból liuhusi kompetisaun regulár.
Tanba, nia hateten, kompetisaun derportiva hanesan kria liga iha Timor-Leste la la’o entaun jogadór iha klubu sira labele kompete, nune’e bele fó impaktu ba iha ekipa selesaun nasionál sira joga iha rai-li’ur sempre lakon.
“Ita laiha liga no ita ba kompete mós lakon hela de’it. Presiza reforma ida-ne’e hodi haree fukun saida mak afeta ba ita-nia futeból. Tanba ne’e mak dezenvolvimentu foteból iha Timor-Leste ne’e la la’o ba oin ne’e,” nia dehan.
Tanba, tuir nia, fasilidade ba deportu atu promove modalidade sira bele hetan kompetisaun di’ak iha nivel rejionál ne’e kuaze laiha no laiha atividade sira hanesan liga laiha, entaun jogadór sira ba rai- li’ur ne’e tenke enfrenta derrota.
“Ita la halibur joven sira ho talentu. Ita-nia foteból iha Timor ne’e mate ona. Ami hanesan sosiedade sivil, kontinua impoen katak modalidade foteból ne’e tenke dezenvolve sai di’ak,” nia dehan.
Jornalista : Jesuína Xavier
Editór : Cancio Ximenes
