DILI, 03 jullu 2024 (TATOLI)–Movimentu Amante Futeból, José Luís Oliveira, sujere ba Federasaun Futeból Timor-Leste (FFTL) no Ministériu Juventude Desportu Arte no Kultura (MJDAK) atu organiza no presiza promove kompetisaun futeból regulár ba jogadór sira iha rai-laran.
Nia hateten, jogadór selesaun nasionál laiha preparasaun di’ak ba tuir kompteisaun jogu internasionál jogu iha rai-li’ur, tanba jogadór nasionál laiha kompetisaun regulár besik ona tinan rua.
“Faktu ida mak ne’e ita selesaun nasionál ba joga lakon iha rai-li’ur, la’ós lakon de’it ho golu rua ka tolu, maibé lakon ho golu barak. Ida-ne’e hatudu katak ema sira-ne’ebé lidera instituisaun desportu no juventude no lidera federasaun foteból laiha kapasidade,” nia hatete ba Agência Tatoli, iha Faról, kuarta ne’e.
Nia dehan, derota ne’e demaziada tanba hatudu katak jogadór selesaun nasionál Timor-Leste nian ne’e laiha preparasaun, entaun ninia konsikuénsia husi lideransa mak ladi’ak atu dezenvolve futeból iha Timor-Leste no iha mundu.
“Lideransa ladi’ak no lahatene dezenvolve desportu. Dezenvolvimentu foteból la’ós treinu de’it, presiza tebes iha kompetisaun regulár atu jogadór sira bele aprende iha kampu no iha esperiénsia joga. La’ós de’it abilidade maibé mentalidade. Joga ne’e la’ós kestaun abilidade ka skill joga di’ak ka kaer bola di’ak, maibé importante tebes mós ita-nia mentál. Ida-ne’e bazeia ba esperiénsia joga, liuhusi kompetisaun regular,” nia esplika.
Tuir nia, lideransa sira presiza iha ema nia kreatividade no vizaun. Dezenvolvimentu futebol labele konsentra ba infraestrutura, tenki konsentradu iha jogador, fokus iha ema, laos iha infraestrutura. Infraestrutura mak Governu hakarak projetu de’it.
Timor-Leste bele iha treinadór no jogadór di’ak maibé laiha lideransa di’ak maibé la dezenvolve futeból ne’e oinsá. Timor-Leste presiza iha ambiente kompetisaun tenke la’o tanba kompetisaun ne’e nu’udar fatór importante.
“Sira hatudu inkapasidade ba dezenvolvimentu desportu ne’ebé loos. Ita-nia grafiku tun tebe-tebes. Tenke tau ema-ne’ebé iha kapasidade no vizaun, labele hanoin projetu konstrusaun hodi hetan osan. Laiha vizaun ida foteból tuir ita-nia kondisaun. Ita lalika mehi hanesan Indonézia, Malázia no Singapura. Ita-nia rai ki’ik, ita tenke halo jestaun,” nia hateten.
Tuir nia, sira la tau nasaun nia dignidade iha sira-nia ulun, sira tenke hatene moe ba sira-nia kredibilidade no derota ne’e mós afeta ba nasaun, hanesan joga foin lalais iha Austrália ne’e.
“Halo moe de’it anba ita lakon 10-0 ba leten, ne’e hatudu ita la joga bola no la treinu,” nia dehan.
Jornalista : Jesuína Xavier
Editór : Cancio Ximenes
