DILI, 15 jullu 2024 (TATOLI)— Ekipa Sekretaria Estadu Igualdade (SEI) no Ministériu Justisa (MJ), segunda ne’e, fó formasaun ba prizoneiru sira iha Prizaun Becora kona-ba hahalok hirus ho objetivu hodi kontrola emosaun iha família no sosiedade nia le’et.
Atividade ida-ne’e sei hala’o durante semana-ida, hahú loron 15 (ohin) to’o 19 jullu 2024.
“Formasaun ne’e lori maluk prizoneiru hodi halo reflesaun-an ba atitude no liuhusi formasaun ne’e oinsá sira bele jere sira-nia emosaun,” Diretór Jerál SEI, Armando da Costa, hateten hafoin abertura formasaun iha Prizaun Becora.
Diretór Prizaun Becora, Júlio Dias Ximenes, konsidera, estabelesimentu prizionál Becora presiza duni formasaun ne’e, ne’ebé formandu sira-ne’e foti husi kada bloku.
“Tuir loloos iha bloku ne’e ema barak no ami hakarak kapasita maibé dehan presiza ema na’in-35. Iha oportunidade ne’e ha’u husu atu utiliza tempu ba formasaun ne’e ho di’ak no karik iha dúvida husu ba ita-nia formadór sira, nune’e bele hakle’an informasaun,” nia akresenta.
Notísia relevante : Prizaun Becora enfrenta problema rekursu umanu no transporte
Diretór dehan, liuhusi formasaun ne’e bele motiva, fó korajen no kapasita prizoneiru sira nune’e bele habelar liután ba maluk seluk, família no sosiedade.
“Ita-nia esperansa husi formasaun ba ita-nia prizioneiru ne’e bainhira ramata, idak-idak nia bloku bele partilla no habelar informasaun ba nia maluk sira. Ba sira ne’ebé besik atu sai husi komarka ne’e habelar tutan ba nia família iha li’ur ne’ebá,” tenik.
Totál prizoneiru iha Becora hamutuk 423, kompostu husi kondenadu 357 no preventiva 66, enkuantu totál prizoneiru iha prizaun tolu hamutuk 600-resin.
Jornalista : Osória Marques
Editora : Julia Chatarina
